پی ٹی آئی سے اختلاف کو اختلاف تک رکھ کر تلخیوں کو دور کرنا چاہتا ہوں، سربراہ جے یو آئی

چارسدہ:جمعیت علمائے اسلام (جے یو آئی) کے سربراہ مولانا فضل الرحمان نے کہا ہے کہ میں پی ٹی آئی سے اختلاف کو اختلاف تک رکھ کر تلخیوں کو دور کرنا چاہتا ہوں، میں پی ٹی آئی کے تلخ رویے اور بد اخلاقی پر کوئی جواب نہیں دینا چاہتا۔ 

تفصیلات کے مطابق چارسدہ میں صحافیوں سے گفتگو کرتے ہوئے مولانا فضل الرحمان نے پاکستان تحریک انصاف (پی ٹی آئی) کے حوالے سے کہا کہ میں پی ٹی آئی کے ساتھ اختلاف ختم نہیں کررہا لیکن تعلقات کو بہتر بنانا میرے مقاصد میں سے ہے، میں پی ٹی آئی سے اختلاف کو اختلاف تک رکھ کر تلخیوں کو دور کرنا چاہتا ہوں۔

میڈیا گفتگومیں ان کا مزید کہنا تھا کہ میں پی ٹی آئی کے تلخ رویے اور بد اخلاقی پر کوئی جواب نہیں دینا چاہتا، میثاق جمہوریت پر ہم ایک بار ہاں کر چکے ہیں، وہ آج بھی میثاق جمہوریت پر قائم ہے۔

انہوں نے حکومت پر تنقید کرتے ہوئے کہا کہ مدارس بل پر حکومتی اتحاد کی بدنیتی ظاہر ہو چکی ہے، صدر مملکت نے مدارس آرڈیننس ایکٹ پر دستخط کیے ہیں، مدارس آرڈیننس کو توسیع دی جار ہی ہے مگر قانون سازی نہیں ہو رہی۔

انہوں نے کہا کہ امن و امان اور شہریوں کے جان ومال کی ذمہ داری ریاست کی ہے۔ اور خیبر پختونخوا میں اپوزیشن پارٹیاں مخصوص نشست کے لیے عدالتوں میں جا رہی ہیں۔ جبکہ ن لیگ نے مخصوص نشست پر عدالت میں جے یو آئی کے خلاف کیس دائر کیا۔ اور موجودہ حالات میں مسلم لیگ ن کا یہ اقدام کس کو فائدہ دے گا؟ ایسی اپوزیشن کا میں کیا کروں جس کا ہر قدم صوبائی حکومت کے فائدے میں جا رہا ہے۔

سربراہ جے یو آئی کا کہنا تھا کہ اگر سیاستدان میثاق جمہوریت پر عمل کریں تو بہتر ماحول پیدا ہوسکتا ہے، میں نے مشورہ دیا ہے کہ صوبے میں تبدیلی کی ضرورت ہے۔

انہوں نے مزید کہا کہ میں نے پی ٹی آئی کے اندر تبدیلی لانے کی بات کی ہے، موجودہ حالات میں خیبرپختونخوا سیاسی کشمکش کا متحمل نہیں۔

میڈیا سے گفتگومیںان کا کہنا تھا کہ آج بھی کہتا ہوں کہ اس صوبے کی اکثریت جعلی ہے، پی ٹی آئی کی حکومت قائم ہے، عدالت نے تسلیم بھی کیا ہے، تاریخ فیصلہ کرے گی کہ مینڈیٹ چوری کے حوالے سے ہمارا دعویٰ غلط ہے یا درست؟۔