عافیہ صدیقی کیس: وفاقی حکومت نے سپریم کورٹ سے رجوع کر لیا

اسلام آباد: وفاقی حکومت نےڈاکٹر عافیہ صدیقی کیس میں سپریم کورٹ سے رجوع کرتے ہوئے اسلام آباد ہائیکورٹ کا 16 مئی کا آرڈر چیلنج کردیا۔

تفصیلات کے مطابق وفاقی حکومت نے اسلام آباد ہائیکورٹ کا 16 مئی کا آرڈر سپریم کورٹ میں چیلنج کردیا اور اسلام آباد ہائیکورٹ کے حکم نامے کے خلاف اپیل دائر کردی۔

دائر کر دہ اپیل میں کہا گیا ہے کہ 16 مئی کو اسلام آباد ہائیکورٹ نے فوزیہ صدیقی کی درخواست میں ترمیم منظور کی، فوزیہ صدیقی کی اصل درخواست والی استدعا پر عمل ہوچکا، عافیہ صدیقی سے متعلق کونسل رسائی بھی دی جاچکی،درخواست میں ترامیم سے کیس کو طول دیا جارہا ہے۔

حکومت کی جانب سے دائر کر دہ پیل میںمزید کہا گیا ہے کہ ہائیکورٹ آرٹیکل 199 کے اسکوپ سے باہر جاکر کارروائی جاری رکھے ہوئے ہے، اسلام آباد ہائیکورٹ کا 16 مئی کا آرڈر کالعدم قرار دیا جائے۔

واضح رہے کہ اسلام آباد ہائیکورٹ نے ڈاکٹر عافیہ صدیقی کیس میں ان کی بہن ڈاکٹر فوزیہ صدیقی کی درخواست میں ترمیم کی استدعا منظور کرلی تھی۔