دہشت گردی انسانیت کا مشترکہ مسئلہ ہے، پاکستان ہر قسم کی دہشت گردی کی مذمت کرتا ہے،وزیرخارجہ

تیانجن: نائب وزیر اعظم اور وزیر خارجہ اسحاق ڈار نے کہا ہے کہ دہشت گردی انسانیت کا مشترکہ مسئلہ ہے، پاکستان ہر قسم کی دہشت گردی کی مذمت کرتا ہے۔

تفصیلات کے مطابق نائب وزیر اعظم اسحاق ڈار نے ایس سی او وزرائے خارجہ کونسل اجلاس سے خطاب کرتے ہوئے کہا کہ دنیا کودرپیش چیلنجزمیں ایس سی اوکی اہمیت بڑھ گئی ہے، ایس سی او خطے میں امن کیلئے اہم پلیٹ فارم ہے جب کہ پاکستان طویل مدتی تنازعات کےپرامن حل کا حامی ہے۔

حالیہ پاک بھارت کشیدگی کے حوالے سے بات کرتے ہوئے اسحاق ڈار نے کہا کہ  بھارت کے ساتھ کشیدگی کے دوران پاکستان نے ذمہ دارانہ کردار ادا کیا،پاکستان جارحیت کے خلاف اور عدم مداخلت کا حامی ہے۔

انہوں نے مزید کہا کہ جنوبی ایشیا میں پائیدارامن کے لیے دیرینہ تنازعات کا حل ضروری ہے، پاکستان بھارت کے ساتھ سیز فائر پرعمل درآمد کے لیے پرعزم ہے۔

اجلاس سے خطاب میں ان کا کہنا تھا کہ ایران پر اسرائیلی جارحیت اور امریکی حملے کی مذمت کرتے ہیں، غزہ میں اسرائیلی جارحیت پر بھی شدید تشویش ہے۔ اور عالمی برادری کو غزہ کی صورتحال پر کردار ادا کرنا چاہیے۔

اسحاق ڈار نے کہا کہ عالمی برادری فلسطین کے خلاف اسرائیلی جارحیت کا فوری نوٹس لے، پاکستان فلسطین کے مسئلے کے دو ریاستی حل کا حامی ہے،اور متنازعہ علاقوں کی حیثیت تبدیل کرنے کی یکطرفہ کوششوں کی مخالفت کرتے ہیں۔

اجلاس سے خطاب کرتے ہوئے نائب وزیر اعظم نے کہا کہ پاکستان ہر قسم کی دہشتگردی کی مذمت کرتا ہے، اور دہشتگردی انسانیت کا مشترکہ مسئلہ ہے۔ اس سے عالمی امن کو شدید خطرہ لاحق ہے۔