پی ٹی آئی رہنما یاسمین راشد طبیعت خراب ہونے پر اسپتال منتقل

لاہور:پاکستان تحریک انصاف (پی ٹی آئی ) کی رہنما یاسمین راشد کو طبیعت خراب ہونے پر سروسز ہسپتال منتقل کردیا گیا ہے۔

 تفصیلات کے مطابق پی ٹی آئی رہنما ڈاکٹر یاسمین راشد کا سروسز ہسپتال میں طبی معائنہ جاری ہے وہ ایمرجنسی کے سی سی یو میں زیر علاج ہیں۔

اہسپتال انتظامیہ کا کہنا ہے کہ یاسمین راشد کو سانس میں دشواری، دھڑکن تیز اور بلڈ پریشر کی شکایت ہے۔

مزید کہنا تھا کہ ڈاکٹر یاسمین راشد کو معدے میں جلن اور درد بھی ہے، ان کی حالت خطرے سے باہر ہے، ڈاکٹر یاسمین راشد کو تمام ممکنہ طبی سہولیات فراہم کی جا رہی ہیں۔

خیال رہے کہ9 مئی کو القادر ٹرسٹ کیس میں عمران خان کی اسلام آباد ہائی کورٹ کے احاطے سے گرفتاری کے بعد پی ٹی آئی کی طرف سے ملک گیر احتجاج کیا گیا تھا جس کے دوران لاہور کے علاقے ماڈل ٹاؤن میں 9 مئی کو مسلم لیگ (ن) کے دفتر کو جلانے کے علاوہ فوجی، سول اور نجی تنصیبات کو نذر آتش کیا گیا، سرکاری و نجی املاک کو شدید نقصان پہنچایا گیا تھا جب کہ اس دوران کم از کم 8 افراد ہلاک اور 290 زخمی ہوئے تھے۔