حالیہ مون سون بارشوں سےملک میں اب تک کتنی ہلاکتیں ہوئیں؟ رپورٹ جاری

اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) نےحالیہ مون سون بارشوں سے ہونے والے نقصانات کی رپورٹ جاری کر دی، جس کے مطابق ملک بھر میں اب تک 178 افراد جاں بحق اور 491 زخمی ہوئے۔

تفصیلات کے مطابق این ڈی ایم اے کی جانب سےجاری کر دہ رپورٹ کے مطابق 26 جون سے 17 جولائی تک مون سون بارشوں سے ہونے والے جانی و مالی نقصانات کی رپورٹ جاری کردی گئی۔

رپورٹ کے اعدادو شمارکے مطابق ملک بھر میںحالیہ بارشوں کے باعث مجموعی طور پر اب تک 178 افراد جاں بحق اور 491 زخمی ہوئے، پنجاب میں 385 افراد زخمی اور 103 جاں بحق ہوئے، جن میں 50 بچے بھی شامل ہیں۔

رپورٹ کے مطابق اسی طرح صوبہ خیبرپختونخوا میں 38 اموات اور 57 افراد زخمی ہوئےجبکہ سندھ میں 20 افراد جاں بحق اور 40 زخمی ہوئے۔

 اعداد و شمار کے مطابق صوبہ بلوچستان میں 16 اموات اور 4 افراد زخمی ہوئے جبکہ آزاد کشمیر میں ایک شخص جاں بحق ہوا۔

این ڈی ایم اے کی جانب سے کہا گیا ہے کہ گزشتہ 24 گھنٹے میں 54 افراد جاں بحق ہوئے جن میں 22 بچے شامل ہیں، اس دوران  227 زخمی ہوئے۔

 این ڈی ایم نے مالی نقصانات کی تفصیلات کے بارے میں کہاہے کہ ملک بھر میں گزشتہ 24 گھنٹوں کے دوران 88 گھروں کو نقصان پہنچا،مجموعی طور پر اب تک 610 گھروں کو نقصان پہنچا ،126 مویشی پانی میں بہہ گئے۔