وزیر خارجہ اگلے ہفتے امریکہ کا سرکاری دورہ کریں گے،دفتر خارجہ

اسلام آباد: ترجمان دفتر خارجہ کے مطابق نائب وزیراعظم وزیر خارجہ اسحاق ڈار اگلے ہفتے امریکا کا دورہ کریں گے۔

تفصیلات کے مطابق دفتر خارجہ کی جانب سے جاری کر دہ بیان میں کہا گیا ہےکہ نائب وزیر اعظم اقوام متحدہ میں اعلیٰ سطح کے مباحثے کی صدارت کریں گے،اس کے علاوہ سلامتی کونسل کے مشرق وسطیٰ کی صورتحال پر سہ ماہی مباحثے کی صدارت بھی کریں گے۔

 ترجمان دفتر خارجہ کی جانب سے بتایا گیا ہے کہ دورے کے دوران وزیر خارجہ اسحاق ڈار او آئی سی اور اقوام متحدہ کے تعاون پر سلامتی کونسل میں اعلیٰ سطح کی بریفنگ کی صدارت بھی کریں گے۔

اسحاق ڈار فلسطین کے مسئلے کے پُرامن حل اور دو ریاستی حل سے متعلق عالمی کانفرنس میں شرکت کریں گے،کانفرنس میں مسئلہ فلسطین کے پُرامن حل کے لیے پاکستان کی غیر متزلزل حمایت کا اعادہ کیا جائے گا۔

 ترجمان دفتر خارجہ کا کہنا تھا کہ دورے کے دوران اقوام متحدہ حکام اور مختلف وزرائے خارجہ سے دوطرفہ ملاقاتیں بھی ہوں گی۔

ترجمان کی جانب سے مزید کہا گیا ہے کہ یہ دورہ پاکستان کے بڑھتے ہوئے عالمی کردار اور امریکا سے وسیع تعلقات کی عکاسی کرتا ہے۔