پاکستان کاعراق میں آتشزدگی کے المناک واقعےپرگہرے افسوس کااظہار

تفصیلات کے مطابق ایک بیان میں ترجمان دفتر خارجہ زاہد حفیظ چوہدری نے واقعہ میں کئی قیمتی جانوں کے ضیاع اور زخمیوں پر عراقی حکومت اور عوام سے اظہار تعزیت کیا۔ انہوں نے کہا کہ پاکستان دکھ کی اس گھڑی میں برادرانہ ملک عراق کے ساتھ کھڑا ہے۔

واضح رہے کہ چند روز قبل عراقی شہر ناصریہ کےاسپتال کے کورونا وارڈ میں آکسیجن سلنڈر پھٹنے سے آگ بھڑک اٹھی تھی جس میں 92افراد جھلس کر ہلاک  جبکہ 100سے زائد  زخمی ہوگئے تھے۔ سرکاری طور پر ابھی یہ نہیں بتایا گیا کہ کورونا  وارڈ میں آتشزدگی کی وجہ کیا ہے لیکن  ابتدائی اطلاعات  کے مطابق آگ  آکسیجن سلنڈر کے پھٹنے سےلگی ہے۔

حکام کے مطابق اس ہسپتال  میں یہ نیا وارڈ صرف تین ماہ قبل تعمیر کیا گیا تھا جس میں 70 بیڈز  کی گنجائش تھی ۔ محکمہ صحت کے عہدیدار کاکہنا ہے  کہ آگ لگنے کے وقت کم از کم 63 افراد وارڈ میں موجود تھے ۔خبر رساں ادارے روئٹرز کے مطابق آتشزدگی کے مقام پر لواحقین  کے رشتہ داروں اور پولیس میں ہونے والی جھڑپوں میں پولیس کی دو گاڑیوں کو نذر آتش کر دیا گیا ہے ۔

عراقی وزیر اعظم مصطفی الخادمی نے ہسپتال  کے سربراہ کی گرفتاری کا حکم  بھی جاری کیا ہے۔

رواں برس اپریل میں دارالحکومت بغداد کے ایک اسپتال میں  آکسیجن ٹینک میں آگ لگنے سے   کم از کم 82 افراد ہلاک ہوگئے تھے  ، اس واقعے کے بعد وزیر صحت  التمیمی نے استعفیٰ دے دیا تھا۔

عراق میں برسوں سے جاری شورش اور افراتفری کی وجہ سے ہسپتالوں  کی حالت  بے حد خراب ہے اورعالمی وبا  کورونا وائرس  کے باعث  عراق کی صحت کا شعبہ شدید دباؤ کا شکار ہے ۔ جان ہاپکنز یونیورسٹی کے اعداد و شمار کے مطابق  عراق میں 1.4 ملین  کیسز  ریکارڈ ہوئے ہیں اور کورونا وائرس سے 17ہزار افراد جان سے ہاتھ دھوبیٹھے ہیں ۔