آئی ایس پی آر سمر انٹرن شپ، لیفٹیننٹ جنرل احمد شریف چودھری کی طلبہ کیساتھ خصوصی نشست

آئی ایس پی آر سمر انٹرن شپ 2025 کامیابی سے جاری ہے جس میں ملک بھر کے 33 شہروں سے 6500 سے زائد طلباء و طالبات حصہ لے رہے ہیں۔

اس انٹرن شپ میں 150 سے زائد جامعات اور تعلیمی اداروں کے طلبہ شریک ہیں جو پاکستان کی نوجوان نسل کے عزم و جذبے کی بھرپور عکاسی کرتے ہیں۔

ڈی جی آئی ایس پی آر لیفٹیننٹ جنرل احمد شریف چودھری نے سمر انٹرن شپ میں شریک طلبہ سے خصوصی گفتگو کرتے ہوئے نوجوانوں کے جذبے کو سراہا اور کہا ہے کہ پاکستان کی نوجوان نسل ملک کا مستقبل ہے اور قوم کو آپ پر فخر ہے۔

طلباء نے اپنی گفتگو میں پاک افواج سے والہانہ عقیدت کا اظہار کیا اور کہا کہ پاک افواج پر ہمیں فخر ہے اور ہمیں اپنی افواج سے کوئی جدا نہیں کر سکتا، دشمن عناصر کی کوئی بھی ناپاک کوشش کامیاب نہیں ہونے دی جائے گی۔

طلبہ نے آپریشن "بُنْيَانٌ مَّرْصُوْص" میں پاک افواج کی جانب سے بھارت کو دیئے گئے منہ توڑ جواب کو تاریخی قرار دیتے ہوئے کہا ہے کہ یہ جرأت و بہادری کا وہ باب ہے جسے تاریخ میں ہمیشہ یاد رکھا جائے گا۔

انٹرن شپ میں شریک نوجوانوں نے عزم ظاہر کیا کہ وہ کل بھی پاکستان کے ساتھ کھڑے تھے، آج بھی ہیں اور ہمیشہ ساتھ کھڑے رہیں گے، ملک دشمن عناصر کو ہر محاذ پر شکست دیں گے اور پاکستان کے دفاع میں افواج پاکستان کے شانہ بشانہ کھڑے رہیں گے۔