پاکستان نے امریکی جنرل مائیکل کوریلا کو نشانِ امتیاز (ملٹری) سے نوازا گیا

اسلام آباد: پاکستان نے امریکی سینٹرل کمانڈ کے سربراہ جنرل مائیکل ای کوریلا کو نشانِ امتیاز (ملٹری) عطا کر دیا۔ ایوانِ صدر میں ہونے والی پروقار تقریب میں صدرِ مملکت آصف علی زرداری نے جنرل کوریلا کو یہ اعلیٰ عسکری اعزاز پیش کیا۔

آئی ایس پی آر کے مطابق، جنرل کوریلا کو یہ اعزاز علاقائی سلامتی، انسداد دہشتگردی اور پاک-امریکا دفاعی تعلقات میں نمایاں خدمات کے اعتراف کے طور پر دیا گیا۔ ان کی آمد پر تینوں مسلح افواج کے چاق و چوبند دستے نے گارڈ آف آنر پیش کیا۔

جنرل مائیکل کوریلا نے اس موقع پر پاکستان کی سول و عسکری قیادت سے اہم ملاقاتیں کیں، جن میں دہشتگردی کے خلاف تعاون، دفاعی اشتراک، اور خطے میں پائیدار امن کے حوالے سے تفصیلی گفتگو ہوئی۔

آئی ایس پی آر کے اعلامیے کے مطابق، یہ پیشرفت پاکستان اور امریکہ کے درمیان دفاعی شراکت داری کے گہرے اور مستحکم تعلقات کی مظہر ہے۔ جنرل کوریلا کا وژن علاقائی امن اور انسداد دہشتگردی کی کوششوں میں کلیدی کردار ادا کر رہا ہے۔

قبل ازیں، اسلام آباد میں منعقدہ ’’مضبوط ربط، محفوظ امن‘‘ ریجنل چیفس آف ڈیفنس اسٹاف کانفرنس میں بھی جنرل کوریلا نے شرکت کی۔ اس کانفرنس میں قازقستان، کرغزستان، تاجکستان اور ازبکستان کے اعلیٰ عسکری حکام بھی شریک ہوئے۔ اس موقع پر چیف آف آرمی اسٹاف فیلڈ مارشل عاصم منیر نے خطے میں امن، ترقی اور تعاون کے لیے پاکستان کے عزم کا اعادہ کیا۔