ڈاکٹر عافیہ صدیقی کے کیس پر بیان کا غلط مطلب لیا گیا، اسحاق ڈار کی وضاحت

نائب وزیراعظم و وزیر خارجہ اسحاق ڈار نے ڈاکٹر عافیہ صدیقی سے متعلق اپنے حالیہ بیان پر وضاحت جاری کر دی ہے۔ انہوں نے کہا کہ ان کا واشنگٹن میں اٹلانٹک کونسل تھنک ٹینک میں دیا گیا بیان سیاق و سباق سے ہٹ کر پیش کیا جا رہا ہے۔

اپنی ٹوئٹ میں اسحاق ڈار نے وضاحت کی کہ ان سے عمران خان سے متعلق سوال کیا گیا تھا، جس کے جواب میں ڈاکٹر عافیہ صدیقی کا تذکرہ محض حوالہ کے طور پر آیا، لیکن اسے غلط انداز میں پیش کیا گیا۔

انہوں نے کہا کہ مسلم لیگ (ن) کی حکومتوں نے ہمیشہ ڈاکٹر عافیہ صدیقی کی رہائی کے لیے ہر ممکن سفارتی اور قانونی کوششیں کی ہیں اور یہ عمل مستقبل میں بھی جاری رہے گا، جب تک کہ ان کی رہائی ممکن نہ ہو جائے۔

میریے گزشتہ روز اٹلانٹک کونسل تھنک ٹینک واشنگٹن میں عمران خان کے کیس کے بارے سوال کے جواب میں ڈاکٹر عافیہ صدیقی کے کیس کے حوالے کو سیاق و سباق سے ہٹ کر لیا جا رہا ہے. ن لیگ کی حکومتوں کے ادوار میں ہم ہمیشہ ڈاکٹر عافیہ صدیقی کی رہائی کے لئیے تمام تر سفارتی اور عدالتی معاونت…

— Ishaq Dar (@MIshaqDar50) July 26, 2025

نائب وزیراعظم کا کہنا تھا کہ ہر ملک کا اپنا عدالتی و قانونی نظام ہوتا ہے، جس کا احترام کیا جانا چاہیے، چاہے وہ پاکستان ہو یا امریکا۔

اسحاق ڈار نے زور دیتے ہوئے کہا کہ ڈاکٹر عافیہ صدیقی کے کیس پر موجودہ حکومت کا مؤقف دو ٹوک، واضح اور غیر مبہم ہے۔