پاکستان نے انٹرنیشنل بائیولوجی اولمپیاڈ میں پہلا گولڈ میڈل جیت لیا

پاکستان نے بین الاقوامی سطح پر ایک اور علمی سنگِ میل عبور کرتے ہوئے 35ویں انٹرنیشنل بائیولوجی اولمپیاڈ میں اپنا پہلا گولڈ میڈل حاصل کر لیا۔

اٹامک انرجی کمیشن کے ترجمان کے مطابق یہ بین الاقوامی مقابلہ 20 جولائی سے فلپائن میں منعقد ہوا، جس میں دنیا بھر سے باصلاحیت طلبہ نے شرکت کی۔

پاکستان کی نمائندگی کرنے والے عبدالرافع پراچہ نے شاندار کارکردگی کا مظاہرہ کرتے ہوئے گولڈ میڈل اپنے نام کیا۔ اس ٹیم کی قیادت ڈاکٹر اسما عمران اور ڈاکٹر اسما رحمان نے کی۔

اولمپیاڈ میں پاکستان کی ایک اور طالبہ عیان اسلم نے آنریبل مینشن حاصل کیا، جبکہ سعدیہ ذوالفقار اور عروج فاطمہ نے بھی پاکستان کی نمائندگی کرتے ہوئے قابلِ فخر کارکردگی دکھائی۔

ترجمان کے مطابق یہ کامیابی نہ صرف طلبہ کی انفرادی محنت کا نتیجہ ہے بلکہ پاکستان کے تعلیمی اداروں، بالخصوص ایٹمی توانائی کمیشن کے ماتحت تعلیمی اداروں کی معیارِ تعلیم کی بھی عکاس ہے۔