اٹلی سے روانہ ہونے والی امدادی کشتی ’حنظلہ‘ غزہ کے قریب پہنچ گئی

اٹلی سے غزہ کے لیے روانہ ہونے والی امدادی کشتی ’حنظلہ‘ فلسطینی عوام کے لیے امید کا پیغام بن کر غزہ کے قریب سمندر میں داخل ہو چکی ہے۔ بین الاقوامی خبر ایجنسیوں کے مطابق یہ کشتی اس وقت غزہ سے صرف 150 کلومیٹر کی دوری پر ہے۔

فریڈم فلوٹیلا کولیشن (Freedom Flotilla Coalition) کے تحت چلائے جانے والے اس مشن میں فلسطین سے ہمدردی رکھنے والے 15 رضاکار سوار ہیں، جن میں 2 فرانسیسی ارکانِ پارلیمنٹ بھی شامل ہیں۔ ان کا مقصد غزہ میں کئی مہینوں سے بھوک اور محاصرے کا شکار فلسطینیوں تک امدادی سامان پہنچانا ہے۔

یہ کشتی 13 جولائی کو اٹلی سے روانہ ہوئی تھی اور اب اس مقام سے بھی آگے بڑھ چکی ہے جہاں گزشتہ ماہ میڈلین نامی امدادی کشتی کو اسرائیلی بحریہ نے روک کر واپس بھیج دیا تھا۔

یاد رہے کہ میڈلین بھی فلسطینیوں کے لیے امدادی سامان لے کر غزہ کی جانب بڑھ رہی تھی، تاہم اسرائیلی فورسز نے اسے تقریباً 200 کلومیٹر پہلے روک لیا تھا۔ منتظمین کے مطابق حنظلہ کو اب تک کسی رکاوٹ کا سامنا نہیں ہوا۔

یہ مشن عالمی برادری کے لیے ایک اور موقع ہے کہ وہ فلسطینی عوام کی مشکلات کی طرف توجہ دے اور انسانی امداد کی راہ میں حائل رکاوٹوں کے خلاف آواز بلند کرے۔