شہریوں کے لیے اچھی خبر ،اگلے 3 ماہ کیلئے بجلی کی قیمتوں میں کمی کاامکان

اسلام آباد: مہنگائی سے پریشان عوام کے لیےاچھی خبر سامنے آئی ہے،اگلے 3 ماہ کیلئےملک بھر کے صارفین کے لیے بجلی کی قیمت میں کمی کا امکان ہے،وفاقی حکومت نے نرخوں میں کمی کیلئے نیپرا میں درخواست دائر کردی۔

تفصیلات کے مطابق سی پی پی اے نے سہ ماہی ایڈجسٹمنٹ کی مد میں نیپرا میں درخواست دائر کر دی، درخواست مالی سال 2024-25 کی چوتھی سہ ماہی ایڈجسٹمنٹ کی مد میں دائر کی گئی۔

نیپرا کی جانب سے سی پی پی اے کی درخواست پر 4 اگست کو سماعت کی جائے گی،درخواست منظور ہونے کی صورت میں صارفین کو 53 ارب 39 کروڑ روپے سے زائدکا ریلیف کا ملے گا، سہ ماہی ایڈجسٹمنٹ کا اطلاق کے الیکٹرک سمیت سرکاری ڈسکوز پر بھی ہوگا۔

اگست ستمبر اور اکتوبر کیلئے صارفین کو بجلی کی قیمت میں 1 روپے 75 پیسے ریلیف ملے گا جبکہ ستمبر، اکتوبر اور نومبر کے لیے 2 روپے 10 پیسے فی یونٹ تک کا ریلیف حاصل ہو گا۔