بھارت: جھارکھنڈ میں ہندو یاتریوں کی بس کو حادثہ،18 افراد جاں بحق،متعدد زخمی

بھارت کی شمالی ریاست جھارکھنڈ میں ہندویاتریوں کو لے جانے والی بس ہولناک حادثے کا شکار ہوگئی جس کے نتیجے میں 18 افراد جاں بحق جبکہ متعدد زخمی ہو گئے۔

 بھارتی میٖڈیا رپورٹ کے مطابق یہ ہولنا ک حادثہ ریاست جھارکھنڈ میںپیش آیا جہاں ہندویاتریوں کو لے جانے والی بس دوران سفر ٹرک سے جاٹکرائی، جس کے نتیجے میں 18 افراد کے جاں بحق ہوگئے۔

میڈیا رپورٹس میں مزید بتایا گیا ہے کہ یاتریوں کو لے جانے والی بس کی ٹکر گیس سیلنڈر سے بھرے ٹرک سے ہوئی جس کے بعد وہ حادثے کا شکار ہو گئی۔

ریسکیو حکام کے مطابق حادثے میں زخمی ہونے والے یاتریوں کو قریبی اسپتال منتقل کر دیا گیا ہے جہاں ان کو بہتر طبی امداد دی جا رہی ہے۔

مقامی قانون ساز کا کہنا ہےکہ یاتری شراون کے مقدس مہینے کو منانے کے لیے ایک ہندو عبادت گاہ کا سفر کر رہے تھے کہ ان کی بس حادثے کا شکار ہوگئی۔
ہندو یاتری گنگا کا مقدس پانی لے جا رہے تھے تاکہ اسے ہندو دیوتا شیو پر چڑھایا جا سکے، جو تباہی کے دیوتا مانے جاتے ہیں۔

دوسری جانب وزیرِاعظم نریندر مودی نے حادثے میں جاں بحق ہونے والوں کے اہلِ خانہ سے گہرے دکھ اور ہمدردی کا اظہار کیا۔

وزیراعظم کے دفتر کی جانب سے سوشل میڈیا پر جاری کیے گئے بیان میں کہا گیا کہ جھارکھنڈ کے دیوگھر میں پیش آنے والا یہ سڑک حادثہ انتہائی افسوسناک ہے۔