پاک بھارت ٹاکرا: ایشان کشن کی طوفانی اننگ،بھارت کا پاکستان کو جیت کیلئے 176 رنز کا ہدف

کولمبو: آئی سی سی ٹی 20 ورلڈ کپ کے ہائی وولٹیج ٹاکرے میں بھارت نے ایشان کشن کی طوفانی بلے بازی کی بدولت پاکستان کو جیت کیلئے 176 رنز کا ہدف دے دیا۔

پاکستان نے پہلے اوور میں ہی بھارت کی اہم وکٹ گرا دی۔ سلمان آغا نے پہلے اوور میں ہی ابھیشک شرما کو صفر پر آؤٹ کر دیا۔ ابھیشک شرما کا کیچ شاہین شاہ آفریدی نے پکڑا۔

بھارت کی دوسری وکٹ 88 کے مجموعی رنز پر گر ی جب ایشان کشن نے 3 چھکوں اور 10 چوکوں کی مدد سے 40 گیندوں پر 77 رن بنا کرصائم ایوب کی گیند پر کلین بولڈ ہوئے۔

بھارت کی تیسری وکٹ 126 کے مجموعی رنز پر گر گئی۔ صائم ایوب کی گیند پر تلک ورما 25 رنز بناکر ایل بی ڈبلیو آؤٹ ہوئے۔
جبکہ اگلی گیند پر ہی صائم ایوب نے ایک اور بھارتی کھلاڑی ہاردک پانڈیا کی وکٹ لے لی۔ ہاردک پانڈیا بغیر کوئی رن بنائے پویلین لوٹ گئے۔

بھارت کی پاکستان کیخلاف پانچویں وکٹ 159 کے مجموعی رنز پر گر گئی۔ عثمان طارق کی گیند پر سوریا کمار یادیو 32رن بنا کر کیچ آؤٹ ہوئے۔

قومی ٹیم کی جانب سے صائم ایوب نے 3 کھلاڑیوں کو آؤٹ کیا جب کہ کپتان سلمان آغا اور عثمان طارق نے 1، 1 وکٹ حاصل کی۔

خیال رہے کہ اس سے قبل پاکستان نے ٹاس جیت کر بھارت کو پہلے بلے بازی کرنے کی دعوت دی تھی۔ ٹاس کے بعد بھارتی کپتان نے سپرٹ آف کرکٹ کی خلاف ورزی کرتے ہوئے پاکستانی کپتان سے ہاتھ نہیں ملایا۔

پاکستانی سکواڈ

صاحبزادہ فرحان، صائم ایوب، سلمان علی آغا اور عثمان خان ، بابراعظم، شاداب خان، محمد نواز، فہیم اشرف ،عثمان طارق، شاہین آفریدی اور ابرار احمد شامل ہیں۔

بھارتی سکواڈ

بھارتی ٹیم میں ابھیشیک شرما اشان کشن، تلک ورما، سوریا کمار یادیو، ہاردک پانڈیا شیوم دوبے اور اکشرپٹیل ورن چکرورتی، کلدیپ یادیو اور جسپریت بمرا بھارتی ٹیم کا حصہ ہیں۔ 

دوسری جانب چئیرمین پاکستان کرکٹ بورڈ محسن نقوی پریما داسا انٹرنیشنل کرکٹ سٹیڈیم پہنچ گئے جنہوں نے ٹیم کی جانب سے نیک تمناؤں کا اظہار کیا ہے۔