اٹک: سیلابی ریلہ گاڑی بہا لے گیا، دو خواتین جاں بحق، تین افراد لاپتا

اٹک : اٹک میں ایک افسوسناک واقعے میں شادی کی تقریب میں شرکت کے لیے جانے والا خاندان حادثے کا شکار ہو گیا، جب ان کی گاڑی اچانک آنے والے سیلابی ریلے میں بہہ گئی۔

ڈپٹی کمشنر اٹک، راؤ عاطف کے مطابق، واقعہ اس وقت پیش آیا جب خاندان شادی میں شرکت کے لیے سفر کر رہا تھا کہ راستے میں تیز بہاؤ والے سیلابی پانی نے گاڑی کو اپنی لپیٹ میں لے لیا۔ گاڑی میں کل 10 افراد سوار تھے۔

ڈی سی اٹک کا کہنا ہے کہ حادثے کے فوراً بعد ریسکیو آپریشن شروع کر دیا گیا، جس کے نتیجے میں 5 افراد کو بحفاظت نکال لیا گیا، جب کہ 2 خواتین کی لاشیں برآمد ہو چکی ہیں۔ 3 افراد تاحال لاپتا ہیں جن کی تلاش جاری ہے۔

دوسری جانب پی ڈی ایم اے نے پنجاب بھر میں مزید بارشوں کی پیش گوئی کرتے ہوئے شہریوں کو اربن فلڈنگ اور طغیانی سے متعلق خبردار کیا ہے۔

ریسکیو ٹیمیں لاپتا افراد کی تلاش کے لیے مسلسل امدادی کارروائیاں کر رہی ہیں۔ ضلعی انتظامیہ نے شہریوں سے اپیل کی ہے کہ وہ خراب موسم اور ممکنہ سیلابی صورتحال کے پیش نظر غیر ضروری سفر سے اجتناب کریں۔