کینیڈا کا فلسطینی ریاست کو تسلیم کرنے کا اعلان، امریکا اور اسرائیل کا شدید ردعمل

کینیڈا کے وزیر اعظم مارک کارنی نے ستمبر 2025 میں اقوامِ متحدہ کی جنرل اسمبلی کے 80ویں اجلاس میں ریاستِ فلسطین کو تسلیم کرنے کا اعلان کیا ہے، جسے انہوں نے مشرقِ وسطیٰ میں دو ریاستی حل کی بقا کے لیے ناگزیر قدم قرار دیا۔

فرانسیسی خبر رساں ادارے اے ایف پی کے مطابق، کارنی کا کہنا تھا کہ "دو ریاستی حل" کینیڈا کی دیرینہ پالیسی ہے، جو اب خطرے میں ہے، اور اسے بچانے کے لیے عالمی برادری کو فوری اقدامات کی ضرورت ہے۔

انہوں نے غزہ میں شہریوں کی ابتر صورتِ حال پر شدید تشویش کا اظہار کرتے ہوئے کہا کہ اب مزید تاخیر کی گنجائش باقی نہیں رہی۔

صحافیوں کے سوال پر کہ کیا کینیڈا اپنا مؤقف تبدیل کر سکتا ہے، کارنی نے کہا: "ایسا ممکنہ منظرنامہ شاید ہو، لیکن وہ میری سوچ سے باہر ہے۔"

امریکی صدر ڈونلڈ ٹرمپ نے کینیڈا کے اس فیصلے پر شدید ردعمل دیتے ہوئے اپنے سوشل میڈیا پلیٹ فارم "ٹروتھ سوشل" پر کہا  کینیڈا نے ابھی فلسطین کی ریاست کو تسلیم کرنے کا اعلان کیا ہے۔ اس کے بعد ان کے ساتھ تجارتی معاہدہ کرنا بہت مشکل ہو جائے گا۔ 

کینیڈا کے اس اقدام کو اسرائیل نے مسترد کر دیا ہے۔ اوٹاوا میں اسرائیلی سفارت خانے کا کہنا ہے کہ "فلسطینی ریاست کو تسلیم کرنا دراصل 7 اکتوبر 2023 کی حماس کی بربریت کو انعام دینا اور جواز فراہم کرنا ہے ۔ 

فلسطینی اتھارٹی کے صدر محمود عباس نے کینیڈا کے اس اعلان کو "تاریخی فیصلہ" قرار دیا، جب کہ فرانس نے خطے میں امن کے امکانات کو بحال کرنے کے لیے کینیڈا کے ساتھ مل کر کام کرنے کا عزم ظاہر کیا ہے۔