جنیوا میں پاک-ایران اسپیکرز کی ملاقات، دو طرفہ پارلیمانی تعاون پر اتفاق

اسپیکر قومی اسمبلی سردار ایاز صادق نے جنیوا میں منعقدہ چھٹی عالمی اسپیکرز کانفرنس کے موقع پر ایرانی ہم منصب ڈاکٹر محمد باقر قالیباف سے ملاقات کی۔ ملاقات کے دوران دونوں رہنماؤں نے دو طرفہ پارلیمانی تعلقات کو مزید مستحکم کرنے اور باہمی تعاون کے فروغ پر اتفاق کیا۔

ایرانی اسپیکر نے ایران پر اسرائیلی جارحیت کے خلاف پاکستان کی بھرپور حمایت پر شکریہ ادا کیا، اور اسے "برادرانہ تعلقات کا عملی مظہر" قرار دیا۔

ملاقات میں اسپیکر ایاز صادق نے کہا کہ پاکستان اور ایران کے درمیان تاریخی، برادرانہ اور قریبی تعلقات قائم ہیں۔ انہوں نے واضح کیا کہ پاکستان، ایران کی خودمختاری اور علاقائی سالمیت کی مکمل حمایت کرتا ہے۔

ایاز صادق نے کہا کہ مشرقِ وسطیٰ میں پائیدار امن کا قیام پورے خطے کی ترقی اور خوشحالی کے لیے ضروری ہے۔ انہوں نے ایران پر اسرائیلی حملے کو بین الاقوامی قوانین کی کھلی خلاف ورزی قرار دیتے ہوئے کہا کہ پاکستان ہمیشہ عالمی تنازعات کا پرامن اور مذاکراتی حل چاہتا ہے، بالخصوص ایران کے جوہری پروگرام سے متعلق بھی یہی مؤقف ہے۔

اسپیکر نے مزید بتایا کہ پاکستانی پارلیمان نے ایران پر اسرائیلی حملے کے خلاف متفقہ قراردادیں منظور کیں، جو پاکستان کے مؤقف کی عکاس ہیں۔

ایرانی اسپیکر ڈاکٹر محمد باقر قالیباف نے بھی کہا کہ ایران، پاکستان کے ساتھ مضبوط برادرانہ تعلقات کو نہایت اہمیت دیتا ہے، اور پاکستانی عوام اور پارلیمان کی جانب سے اظہارِ یکجہتی کو ہمیشہ قدر کی نگاہ سے دیکھا جائے گا۔