کراچی: ایف آئی اے کی کارروائی، غیرقانونی طور بیرون ملک جانے والے 7 مسافر گرفتار

کراچی: وفاقی تحقیقاتی ادارے( ایف آئی اے) امیگریشن حکام نے کارروائی کرتے ہوئے کراچی ائیرپورٹ پرغیرقانونی طور پر بیرون ملک جانے والے 7مسافروں کوآف لوڈ کردیا۔

ترجمان ایف آئی اے کے مطابق جناح ٹرمینل ائیرپورٹ پر تعینات امیگریشن عملے نے کارروائیوں کے دوران غیرقانونی طور پر بیرون ملک سفر کرنے کی کوشش ناکام بناتے ہوئے7 مسافروں کو آف لوڈ کردیا۔

ترجمان نے بتایا کہ مسافر وزٹ ویزے پر آذربائیجان جا رہے تھے،جبکہ حکام نے امیگریشن کلئیرنس کےدوران مسافروں کو مشکوک پایا۔

حکام نے کہا کہ ابتدائی تفتیش کے مطابق مسافروں نے باکو سے دبئی اور ملائیشیا کے راستے ترکیہ اور لیبیا سفر کرنا تھا،جہاں نے انہوں نے بعد ازاں ترکیہ اور لیبیا سے غیرقانونی طور پر سمندر کے راستے اٹلی جانے کا منصوبہ تھا۔

ترجمان ایف آئی اے نےمزید بتایا کہ مسافر مختلف ایجنٹوں سے رابطے میں تھے۔

حکام کا کہنا تھا کہ مسافروں نےایجنٹوں سے 20 لاکھ سے 45 لاکھ روپےفی کس پر یورپ جانے کےمعاملات طے کیے ہوئے تھے تاہم مسافروں کو آف لوڈ کرکے اینٹی ہیومن ٹریفکنگ سرکل کراچی منتقل کردیا گیا۔