پاکستان سمیت اسلامی ممالک کی اسرائیلی وزراء کی مسجد اقصیٰ کی بے حرمتی کی شدید مذمت

اسرائیلی وزراء کے مسجد اقصیٰ پر مسلح دھاوے اور بے حرمتی پر پاکستان سمیت مسلم دنیا نے شید مذمت کرتے ہوئے قیام امن کی کوششوں کے لیے سنگین خطرہ قرار دے دیا۔

وزیراعظم پاکستان شہباز شریف نے اسرائیلی انتہا پسند وزیر برائے قومی سلامتی اتمار بن گویر کی مسجد اقصیٰ پر مسلح دھاوے کی شدید مذمت کرتے ہوئے اسے بین الاقوامی قانون کی خلاف ورزی اور مشرق وسطیٰ میں قیام امن کی کوششوں کے لیے سنگین خطرہ قرار دیا ہے۔

سوشل میڈیا پلیٹ فارم ایکس پر اپنے پیغام میں وزیراعظم شہباز شریف نے کہا کہ پاکستان اسرائیلی وزراء کی جانب سے قابض پولیس کے سائے میں مسجد اقصیٰ پر دھاوے اور ناجائز آباد کاروں کے ساتھ اس میں داخلے کی شدید الفاظ میں مذمت کرتا ہے۔ یہ عمل ایک ارب سے زائد مسلمانوں کے مقدس جذبات کی توہین اور عالمی قوانین کی صریح خلاف ورزی ہے۔‘

Pakistan unequivocally condemns, the recent act of storming of the Al-Aqsa Mosque by Israeli ministers, accompanied by settler groups and shielded by Israeli police.

This sacrilege against one of Islam’s holiest sites is not only an affront to Muslims worldwide but also a…

— Shehbaz Sharif (@CMShehbaz) August 4, 2025

وزیراعظم شہباز شریف نے اسرائیل کے ان ”بے شرمانہ اقدامات“ کو خطے میں کشیدگی بڑھانے کی دانستہ کوشش قرار دیا اور کہا کہ اس طرح کے واقعات مشرق وسطیٰ کو مزید عدم استحکام کی طرف دھکیل رہے ہیں۔ انہوں نے غزہ میں فوری جنگ بندی اور مشرقی القدس کو دارالحکومت بنا کر فلسطینی ریاست کے قیام کی حمایت پر زور دیا۔

اتوار کو اسرائیلی وزیر بن گویر نے مقبوضہ مشرقی بیت المقدس میں واقع مسجد اقصیٰ کے احاطے میں دراندازی کی اور مبینہ طور پر تلمودی رسومات ادا کیں، اس دوران اسرائیلی قابض فورسز نے ان کو تحفظ فراہم کیا۔ اس موقع پر کم از کم ایک ہزار سے زائد غیر قانونی آبادکار مسجد اقصیٰ میں داخل ہوئے، جبکہ فلسطینی نمازیوں، صحافیوں اور مسجد کے محافظوں پر حملے کیے گئے۔

واضح رہے کہ پاکستان نے ہمیشہ فلسطینی عوام کے حق خودارادیت، قبلہ اول کے تحفظ اور اسرائیلی مظالم کے خلاف آواز بلند کی ہے۔ گزشتہ ماہ پاکستان نے اقوام متحدہ کی سلامتی کونسل کی صدارت کے دوران بھی غزہ کی بگڑتی انسانی صورتحال پر عالمی توجہ مرکوز کی تھی۔

عرب پارلیمنٹ اور اسلامی تعاون تنظیم (او آئی سی) نے بھی اسرائیلی وزیروں اور آبادکاروں کے مسجد اقصیٰ پر دھاوے کی سخت الفاظ میں مذمت کی ہے۔ او آئی سی نے ان اقدامات کو عالمی امن و سلامتی کے لیے خطرہ اور فلسطینی عوام و مقدسات کے خلاف منظم جارحیت قرار دیا۔

خیال رہے کہ اسرائیل نے 1967ء کی عرب اسرائیل جنگ میں مشرقی یروشلم پر قبضہ کیا تھا اور 1980ء میں اسے یکطرفہ طور پر اپنا دارالحکومت قرار دے دیا، جسے عالمی برادری نے کبھی تسلیم نہیں کیا۔ مسجد اقصیٰ مسلمانوں کا تیسرا مقدس ترین مقام ہے جبکہ یہودی اسے ”ٹیمپل ماؤنٹ“ کہتے ہیں اور اسے اپنے دو قدیم مندروں کا مقام قرار دیتے ہیں۔