پنجاب حکومت نے 500 روپے کورٹ فیس کا نوٹیفکیشن واپس لے لیا

لاہور:چیف جسٹس لاہور ہائیکورٹ کے اقدامات سے 500 روپے کورٹ فیس کا نوٹیفکیشن پنجاب حکومت نے واپس لے لیا۔

تفصیلات کے مطابق پنجاب حکومت نے فنانس بل 2024 میں ترمیم کر تے ہوئے کورٹ فیس کا نوٹیفکیشن واپس لے لیا ہے۔

چیف جسٹس عالیہ نیلم نے ملتان اور بہاولپور میں مصدقہ کاپی کی فیس 500روپے فیس ختم کرنے کا اعلان کیا تھا۔

اس حوالے سے چیف جسٹس عالیہ نیلم نے کہا ہے کہ کورٹ فیس میں اضافہ میری حلف برداری سے پہلے ہوا، میں جب سے آئی ہوں وکلاء کی ویلفیئر کے لیے کام کیا، مجھے پتہ ہے میری لاہور بار کی عمارت کہاں کھڑی ہے، پورے پنجاب میں وکلاء کے لیے جوڈیشل کمپلیکس بنائے۔

انہوں نے کہا ہے کہ ایوان عدل کی عمارت کبھی بھی گر سکتی ہے، لاہور کے مسائل تو دہائیوں پرانے ہیں، وکلاء تنظیموں کے عہدیداران ناکام ہوئے تو پھر میں نے پنجاب حکومت سے بات چیت کی۔

چیف جسٹس نے بتایا ہے کہ میں نے چیف سیکرٹری سے میٹنگ کی، میرے بارے میں بہت کچھ کہا گیا لیکن درگزر سے کام لیا، جب آپ بار کے صدر بن جاتے ہیں تو کسی جماعت کے صدر نہیں ہوتے۔

خیال رہے کہ پنجاب حکومت نے کورٹ فیس 50روپے سے بڑھا کر 500روپے کر دی تھی۔