عمر ایوب کی نااہلی سے متعلق ریفرنس کی سماعت 12 اگست کو مقرر

قومی اسمبلی میں سابق قائد حزب اختلاف اور تحریک انصاف کے رہنما عمر ایوب کے خلاف نااہلی ریفرنس کی سماعت 12 اگست کو ہوگی۔

ڈان نیوز کے مطابق، الیکشن کمیشن آف پاکستان (ECP) نے عمر ایوب کے نااہلی کیس کی سماعت کے لیے 12 اگست کی تاریخ مقرر کر دی ہے۔

چیف الیکشن کمشنر کی زیرِ صدارت کمیشن کا بینچ اس ریفرنس پر سماعت کرے گا، جبکہ اس حوالے سے کاز لسٹ بھی جاری کر دی گئی ہے۔

یاد رہے کہ 30 مئی کو اسپیکر قومی اسمبلی سردار ایاز صادق نے اپوزیشن لیڈر عمر ایوب کے خلاف نااہلی ریفرنس الیکشن کمیشن کو بھیجا تھا۔

یہ ریفرنس سابق رکنِ قومی اسمبلی بابر نواز کی جانب سے دائر کی گئی درخواست کی بنیاد پر تیار کیا گیا تھا۔ بابر نواز نے 2024 کے عام انتخابات میں این اے 18 (ہری پور) سے عمر ایوب کے خلاف الیکشن لڑا تھا، جہاں وہ 82 ہزار ووٹوں کے فرق سے شکست کھا گئے تھے۔

الیکشن کمیشن نے ابتدائی طور پر اس ریفرنس کی پہلی سماعت 4 جون کو مقرر کی تھی اور دونوں فریقین، یعنی عمر ایوب اور بابر نواز کو نوٹسز جاری کیے گئے تھے۔