پی ٹی آئی میں واپسی کے لیے شیر افضل مروت کو اندرونی حمایت حاصل ، واپسی کا امکان

پاکستان تحریک انصاف (پی ٹی آئی) سے نکالے گئے رہنما شیر افضل مروت کی پارٹی میں واپسی کی راہ ہموار ہونے لگی ہے۔ پارٹی کے اندر سے انہیں قابلِ ذکر حمایت حاصل ہوگئی ہے، جس کے بعد ان کی واپسی کے امکانات بڑھ گئے ہیں۔

ذرائع کے مطابق پی ٹی آئی کی پارلیمانی پارٹی کے حالیہ اجلاس میں اہم پیش رفت دیکھنے میں آئی، جہاں شیر افضل مروت کی دوبارہ شمولیت پر مثبت ردِعمل سامنے آیا۔ پارٹی کے متعدد ارکان نے ان کی واپسی کی حمایت کر دی ہے۔

اس اجلاس میں شیر افضل مروت نے خود بھی شرکت کی۔ انہوں نے کہا کہ مجھ پر پہلے تنقید کی جاتی تھی، جس کے جواب میں میں بھی اظہارِ خیال کرتا تھا۔ اگر پارٹی اراکین تنقید نہ کریں، تو میں بھی جواب دینے سے گریز کروں گا۔

پارٹی ذرائع کے مطابق نثار جٹ نے بھی شیر افضل مروت کی واپسی کی حمایت کی ہے، اور یہ معاملہ جلد بانی پی ٹی آئی کے سامنے پیش کیا جائے گا۔

اس حوالے سے اسد قیصر کا کہنا تھا کہ پی ٹی آئی کے تمام اہم فیصلے بانی پارٹی کے اختیار میں ہیں۔ شیر افضل مروت کا معاملہ پارلیمانی کمیٹی میں زیرِ بحث آ چکا ہے اور اس پر حتمی فیصلہ بانی کریں گے۔

ذرائع نے مزید بتایا کہ اسامہ میلہ اور خرم ورک نے بھی اجلاس میں شیر افضل مروت کے حق میں اظہارِ خیال کیا۔ شاندانہ گلزار نے کہا کہ ملک سے باہر بیٹھ کر شہباز گل اور شہزاد اکبر وزیراعلیٰ پر بیانات دے رہے ہیں، مگر انہیں کوئی شوکاز نوٹس جاری نہیں ہوا۔ عالیہ حمزہ کی ٹوئٹس پر بھی کسی قسم کی کارروائی نہیں ہوئی۔

ذرائع کا کہنا ہے کہ پارٹی میں بعض اوقات فیصلے یکطرفہ ہوتے ہیں اور شوکاز نوٹسز صرف مخصوص افراد کو جاری کیے جاتے ہیں، جو انصاف کے اصولوں کے خلاف ہیں۔ شاندانہ گلزار کا کہنا تھا کہ شہباز گل بیرونِ ملک سے پارٹی قیادت کے خلاف وی لاگز کر رہے ہیں، مگر ان کے خلاف کوئی کارروائی عمل میں نہیں لائی گئی۔ ذرائع کے مطابق پارلیمانی پارٹی کی اکثریت نے شیر افضل مروت کی واپسی کی حمایت کی ہے۔