وزیراعظم شہباز شریف کی گوادر میں پانی اور بجلی کے مسائل حل کرنے کی ہدایت

وزیراعظم شہباز شریف نے گوادر میں پانی اور بجلی کی فراہمی کے مسائل کے حل کے لیے فوری اقدامات کی ہدایت دی۔

وزیراعظم نے گوادر میں پانی کی قلت پر اجلاس کی صدارت کی، جس میں وزیراعلیٰ بلوچستان سرفراز بگٹی نے ویڈیو لنک کے ذریعے شرکت کی۔

وزیراعلیٰ بلوچستان سرفراز بگٹی نے گوادر کے آبی مسائل، چیلنجز اور جاری اقدامات پر بریفنگ دیتے ہوئے بتایا کہ ایران سے بجلی کی بندش اور برقی عدم استحکام کی وجہ سے ڈی سیلینیشن پلانٹ کی فعالیت متاثر ہو رہی ہے۔ انہوں نے مزید کہا کہ خضدار سے گوادر تک قومی گرڈ لائن کی ناقص منصوبہ بندی کے باعث وولٹیج مستحکم نہیں رہتا، اس لیے اس گرڈ لائن کا ازسرِنو جائزہ لے کر ضروری اصلاحات کی جائیں۔

وزیراعظم نے ہدایت کی کہ وفاقی وزیر پاور ڈویژن، منصوبہ بندی کمیشن اور متعلقہ سیکرٹریز 15 اگست کو گوادر پہنچیں اور وزیراعلیٰ بلوچستان کی مشاورت سے گوادر کے شہریوں کو بلا تعطل پانی کی فراہمی کو یقینی بنائیں۔

وزیراعلیٰ بلوچستان سرفراز بگٹی کا کہنا تھا کہ گوادر کے پانی کے مسائل کے پائیدار حل کے لیے جامع منصوبہ بندی کی جا رہی ہے اور خضدار سے گوادر تک نیشنل گریڈ لائن کا ازسرِنو جائزہ لے کر ضروری اصلاحات کی جائیں گی۔