پنجاب حکومت کی کامیاب حکمت عملی سے گندم کموڈٹی قرض مکمل طور پر ختم

پنجاب حکومت کی کامیاب حکمت عملی کے نتیجے میں پنجاب کا گندم کموڈٹی قرض ختم ہوگیا اور 13 ارب 80 کروڑ روپے کی آخری قسط نیشنل بینک کو ادا کر دی گئی۔

پنجاب حکومت کے مطابق، یہ صوبے کی تاریخ میں ایک نیا ریکارڈ ہے اور گڈ گورننس کی ایک مثالی مثال پیش کرتا ہے۔

وزیراعلیٰ پنجاب مریم نواز کے فیصلوں اور سخت مالیاتی نظم و ضبط کی بدولت پنجاب کے شہریوں کو 30 سال پرانے قرض سے نجات حاصل ہوئی۔ یہ کموڈٹی قرض گندم کی خریداری کے دوران پیدا ہوا تھا، جب اوپن مارکیٹ ریٹ سے زیادہ قیمت پر گندم خریدی جاتی تھی، جس کے باعث آٹے اور روٹی کی قیمتوں میں بے تحاشہ اضافہ ہو گیا تھا۔ اس کا اثر شہریوں پر پڑا اور انہیں مہنگائی کی شکل میں اس کا بوجھ اٹھانا پڑا۔

محکمہ خوراک ہر سال صوبے میں پیدا ہونے والی گندم کا تقریباً 14 فیصد یعنی 35 سے 40 لاکھ میٹرک ٹن خریدتا تھا، جس سے صرف 2 سے 4 لاکھ کسان فائدہ اٹھا پاتے تھے، حالانکہ مجموعی طور پر 70 لاکھ کسانوں کے لیے یہ ایک غیر منصفانہ عمل تھا۔

پنجاب حکومت کے مطابق، اگر گندم خریداری کا یہ غیر منصفانہ کھیل جاری رہتا تو مارچ 2024 تک قرض 1080 ارب روپے اور جون 2024 تک 1.15 کھرب روپے تک پہنچ سکتا تھا، جو کہ پنجاب کے سالانہ بجٹ کا تقریباً 35 فیصد ہوتا۔ قرض کی ادائیگی کے لیے صوبائی بجٹ سے 761 ارب روپے ادا کیے گئے۔

اگر بروقت ادائیگی نہ ہوتی تو پنجاب حکومت کو ماہانہ 50 کروڑ روپے سود کی صورت میں ادا کرنا پڑتا۔ تاہم، قرض کی ادائیگی کے بعد پنجاب حکومت اپنے گندم کے تمام ذخائر کی مکمل مالک بن گئی۔

اس حوالے سے سیکرٹری خزانہ پنجاب مجاہد شیردل نے کہا کہ پنجاب نے 31 سال پرانے مقامی بینکوں کے قرض کو مکمل طور پر ختم کر دیا ہے اور 675 ارب روپے کی واپسی سے مالی خودمختاری کی ایک نئی مثال قائم کی ہے۔

انہوں نے مزید کہا کہ 13 ارب 80 کروڑ کی آخری قسط بھی ادا کر دی گئی، اور اگر بروقت ادائیگی نہ ہوتی تو یومیہ 50 کروڑ روپے سود ادا کرنا پڑتا۔

سیکرٹری خزانہ پنجاب کے مطابق، پنجاب حکومت تین دہائیوں بعد مقامی بینکوں کے قرضوں سے آزاد ہو چکی ہے اور گندم خریداری اور سبسڈی کے 675 ارب روپے کے قرض کو صفر کر دیا ہے۔