آرمینیا-آذربائیجان تنازع حل کرانے میں بہت لوگ ناکام رہے، بالآخر ہم کامیاب ہوئے: ٹرمپ

امریکی صدر ڈونلڈ ٹرمپ نے کہا ہے کہ بہت سے لوگ آرمینیا اور آذربائیجان کے تنازع کو حل کرنے کی کوششیں کر چکے ہیں، لیکن وہ ناکام رہے، اور بالاخر ہم نے ان کے درمیان امن معاہدہ کرانے میں کامیابی حاصل کی ہے۔

اپنے بیان میں ٹرمپ نے مزید کہا کہ وہ پیر کو واشنگٹن میں ہونے والے پُرتشدد جرائم کو روکنے کے بارے میں ایک پریس کانفرنس کریں گے۔

انہوں نے کہا کہ واشنگٹن اب دنیا کے خطرناک ترین شہروں میں شمار ہوتا ہے، لیکن وہ بہت جلد اس شہر کو دنیا کے محفوظ ترین شہروں میں شامل کرنے کے لیے اقدامات کر رہے ہیں۔

آذربائیجان اور آرمینیا کے درمیان امن معاہدے کے بارے میں ٹرمپ نے کہا کہ دونوں ممالک 35 سال سے زیادہ عرصے سے لڑ رہے تھے، اور بہت سے لوگوں نے اس تنازع کو حل کرنے کی کوشش کی، مگر وہ ناکام رہے۔

انہوں نے مزید کہا کہ آرمینیا اور آذربائیجان کے درمیان امن معاہدہ کرانے میں ہم کامیاب ہوئے، اور بطور صدر، میری سب سے بڑی خواہش دنیا میں امن اور استحکام لانا ہے۔