ایکسائز اینڈ ٹیکسیشن میں خیبرپختونخوا اسمبلی کے افسر کی مبینہ غیرقانونی تعیناتی کا انکشاف

خیبرپختونخوا اسمبلی کے ایک ملازم کی محکمہ ایکسائز اینڈ ٹیکسیشن میں مبینہ طور پر غیرقانونی تعیناتی کا انکشاف ہوا ہے۔

آڈیٹر جنرل کے دفتر کی رپورٹ کے مطابق، سعود گنڈاپور کو ایکسائز اینڈ ٹیکسیشن میں تعینات کیا گیا، تاہم ان کی یہ تعیناتی قواعد کے برعکس قرار دی گئی ہے۔ رپورٹ میں بتایا گیا کہ سعود گنڈاپور کو خیبرپختونخوا اسمبلی سے ڈیپوٹیشن پر ایکسائز ڈائریکٹوریٹ میں تعینات کیا گیا، حالانکہ ان کے پاس اسمبلی میں صرف 13 ماہ کا تجربہ تھا اور انہوں نے محکماتی امتحان بھی پاس نہیں کیا تھا۔

رپورٹ میں مزید کہا گیا ہے کہ انہیں اسسٹنٹ ایکسائز اینڈ ٹیکسیشن آفیسر کے طور پر تعینات کیا گیا، جبکہ اس عہدے پر تقرری کے لیے کم از کم 5 سال کا تجربہ اور متعلقہ امتحان کا پاس ہونا لازمی ہے۔ تعیناتی کے بعد سعود گنڈاپور کو ای آئی بی (Excise Intelligence Bureau) کا اضافی چارج بھی سونپا گیا۔

آڈیٹر جنرل کی رپورٹ کے مطابق، اس تعیناتی سے ایکسائز ڈیپارٹمنٹ کے دیگر اہل ملازمین دو عہدوں سے محروم رہ گئے، اور اس عمل کے تحت دی جانے والی تنخواہیں اور دیگر مراعات بھی غیرقانونی قرار دی گئی ہیں۔

رپورٹ میں اس معاملے کی مکمل انکوائری، ذمہ داروں کے تعین اور اصلاحی اقدامات کی سفارش کی گئی ہے۔

اس حوالے سے جیو نیوز کو دیے گئے تحریری جواب میں سعود گنڈاپور نے مؤقف اختیار کیا ہے کہ ان کے خلاف اے پی ٹی رولز کے تحت قائم کیا گیا کیس غلط ہے، کیونکہ سول سرونٹس کو مختلف محکموں میں ڈیپوٹیشن پر تعینات کیا جا سکتا ہے۔ ان کے مطابق، آڈیٹر جنرل آفس نے صرف اپنے مشاہدے کی بنیاد پر اے پی ٹی رولز کا حوالہ دیا، جو درست نہیں۔

سعود گنڈاپور نے مزید کہا کہ حکومت وقتاً فوقتاً سرکاری ملازمین کو مختلف محکموں، خدمات یا عہدوں پر عوامی مفاد میں ڈیپوٹیشن کی بنیاد پر تعینات کرتی ہے ۔