بھارت کا 6 پاکستانی طیارے گرانے کا دعویٰ خود فریبی ہے: چین کے سابق دفاعی اتاشی

جنوبی ایشیا میں چین کے سابق دفاعی اتاشی چنگ ژی ژونگ نے بھارت کی جانب سے پاک-بھارت جھڑپ میں 6 پاکستانی طیارے مار گرانے کے دعوے کو سختی سے مسترد کرتے ہوئے اسے "خود فریبی" قرار دیا ہے۔

غیر ملکی خبررساں ادارے اے ایف پی کے مطابق، بھارتی فضائیہ کے سربراہ ایئرچیف مارشل امرپریت سنگھ نے جھڑپوں کے تین ماہ بعد ایک نیا دعویٰ کرتے ہوئے کہا کہ بھارت نے پاکستان کے پانچ لڑاکا اور ایک فوجی طیارہ مار گرایا تھا۔ تاہم، یہ بیان نہ صرف تاخیر سے سامنے آیا بلکہ شواہد سے بھی عاری تھا، جس پر بھارت میں خود اپوزیشن نے شدید تنقید کی۔

پاکستان پہلے ہی ان الزامات کو "بے بنیاد اور جھوٹا پروپیگنڈا" قرار دے کر مسترد کر چکا ہے، جبکہ وفاقی وزیر دفاع خواجہ آصف نے بھی بھارتی ایئرچیف کے دعوے کو یکسر مسترد کرتے ہوئے اسے جھوٹ کا تسلسل قرار دیا۔

اسی سلسلے میں چینی دفاعی ماہر چنگ ژی ژونگ نے تبصرہ کرتے ہوئے کہا کہ بھارت کی جانب سے کوئی قابلِ اعتماد شواہد، جیسے طیاروں کے ملبے کی تصاویر یا ریڈار ڈیٹا پیش نہیں کیا گیا، جس کے باعث عالمی برادری ان دعوؤں کو مشکوک اور ناقابلِ اعتبار سمجھتی ہے۔

انہوں نے بھارتی فضائیہ کے سربراہ کے بیان کو "مزاحیہ، ناقابلِ یقین اور غیر مؤثر" قرار دیتے ہوئے کہا کہ ایسے دعوے محض قوم کو دھوکا دینے کی کوشش ہیں اور بین الاقوامی معیار پر پورے نہیں اترتے۔

چینی سابق اتاشی نے کہا کہ پاکستان نے نہ صرف بھارت کے 6 جنگی طیارے مار گرائے بلکہ ایس-400 ایئر ڈیفنس سسٹمز کو بھی نشانہ بنایا، اور ان کارروائیوں کے ٹھوس شواہد بھی فراہم کیے گئے، جنہیں عالمی ذرائع ابلاغ میں رپورٹ کیا گیا۔

انہوں نے مزید کہا کہ جھڑپ کے فوراً بعد پاکستان نے عالمی میڈیا کو ایک مکمل اور تکنیکی تفصیلات پر مبنی رپورٹ جاری کی، جب کہ بھارت تاحال کسی بھی دعوے کو ثابت کرنے میں ناکام ہے۔

چنگ ژی ژونگ نے آخر میں کہا:

"دعویٰ کرنا آسان ہے، لیکن اس کی سچائی شواہد سے ثابت ہوتی ہے، اور اس معاملے میں بھارت مکمل طور پر ناکام رہا ہے۔"