سیلاب متاثرہ طالبعلم اکرام اللہ کاکڑ کی میٹرک میں کامیابی، وزیراعظم شہباز شریف سے ملاقات

بلوچستان کے سیلاب سے متاثرہ ایک دور دراز علاقے سے تعلق رکھنے والے طالبعلم اکرام اللہ کاکڑ نے تمام تر مشکلات اور وسائل کی کمی کے باوجود میٹرک کے امتحانات میں نمایاں پوزیشن حاصل کر کے نہ صرف اپنے علاقے بلکہ پورے ملک کا نام روشن کر دیا۔

ان کی اس کامیابی پر وزیرِاعظم شہباز شریف نے انہیں خصوصی طور پر ملاقات کے لیے مدعو کیا۔ سرکاری خبررساں ادارے اے پی پی کے مطابق، یہ ملاقات اتوار کے روز اسلام آباد میں ہوئی جہاں وزیرِاعظم نے اکرام اللہ کی تعلیمی کارکردگی کو سراہتے ہوئے کہا کہ وہ 2022 میں قلعہ سیف اللہ کے دورے کے دوران اکرام اللہ سے ایک امدادی خیمے میں ملے تھے، جہاں اس نے اعلیٰ تعلیم کے حصول کی خواہش ظاہر کی تھی۔ شہباز شریف نے اس وقت اکرام اللہ کے تمام تعلیمی اخراجات اٹھانے کا وعدہ کیا تھا اور انہیں لارنس کالج میں داخل کروایا۔

ملاقات کے دوران اکرام اللہ نے وزیرِاعظم سے کہا کہ انہوں نے وعدہ کیا تھا کہ وہ پوزیشن لے کر واپس آئیں گے اور آج وہ وعدہ پورا کر کے ان کے سامنے کھڑے ہیں۔

وزیرِاعظم نے بتایا کہ انہوں نے حال ہی میں یہ خبر پڑھی کہ اکرام اللہ نے تیسری پوزیشن حاصل کی ہے، جس پر انہیں بے حد خوشی اور فخر محسوس ہوا۔ اکرام اللہ نے اظہارِ تشکر کرتے ہوئے کہا کہ وزیرِاعظم کا رویہ سیاست سے بالاتر تھا، انہوں نے ایک پسماندہ علاقے کے طالبعلم کو ملک کے بہترین تعلیمی ادارے میں تعلیم حاصل کرنے کا موقع دیا۔ انہوں نے بتایا کہ وہ پہلے بھی اسکالرشپ پر پڑھ رہے تھے اور اب اپنی محنت سے ڈبل اسکالرشپ حاصل کی ہے۔

اکرام اللہ نے اپنے عزم کا اظہار کرتے ہوئے کہا کہ وہ مستقبل میں سی ایس ایس کرنا چاہتے ہیں اور انٹرمیڈیٹ میں بھی نمایاں کارکردگی دکھا کر بیرونِ ملک اسکالرشپ حاصل کرنے کی کوشش کریں گے کیونکہ ان کا خواب آکسفورڈ یونیورسٹی میں پڑھنا ہے۔

انہوں نے کہا کہ وہ ملک کا قرض اتارنے کے لیے اپنی بھرپور صلاحیتوں سے ملک و قوم کی خدمت کریں گے۔ وزیرِاعظم نے ان کے جذبے کو سراہا اور انہیں ایک خصوصی تحفہ بھی پیش کیا، جس کے بارے میں انہوں نے کہا کہ یہ تحفہ اکرام اللہ کی تعلیم اور عملی زندگی میں ان کے کام آئے گا۔