الو ارجن ایئرپورٹ پر سیکیورٹی اہلکار سے الجھ پڑے، سوشل میڈیا پر شدید تنقید کا سامنا

بھارتی فلم انڈسٹری کے معروف اداکار الو ارجن ایک بار پھر تنازع کا شکار ہو گئے۔

بھارتی میڈیا رپورٹس کے مطابق الو ارجن کو ممبئی ایئرپورٹ پر سیکیورٹی اہلکار سے تلخ کلامی مہنگی پڑ گئی، اور وہ سوشل میڈیا پر شدید تنقید کی زد میں آ گئے ہیں۔

تفصیلات کے مطابق اداکار ممبئی سے بیرون ملک روانگی کے لیے ایئرپورٹ پہنچے تھے اور انہوں نے ماسک پہن رکھا تھا۔ سیکیورٹی اہلکار نے انہیں چہرے سے ماسک ہٹانے کا کہا، جس پر الو ارجن ناراض ہو گئے اور بحث کرنے لگے۔

سوشل میڈیا پر وائرل ہونے والی ویڈیو میں واضح طور پر دیکھا جا سکتا ہے کہ الو ارجن سیکیورٹی اہلکار سے الجھ رہے ہیں۔ بعد ازاں ان کے ساتھ موجود ایک شخص کی مداخلت پر وہ محض چند لمحوں کے لیے ماسک ہٹاتے ہیں اور فوراً دوبارہ پہن لیتے ہیں۔

ویڈیو کے وائرل ہونے کے بعد صارفین نے الو ارجن کو تنقید کا نشانہ بنایا۔ کئی لوگوں نے انہیں مغرور اور قانون کی خلاف ورزی کرنے والا قرار دیا، جبکہ کچھ نے یاد دلایا کہ شہرت قانون سے بالاتر نہیں بناتی۔

واضح رہے کہ یہ پہلا موقع نہیں کہ الو ارجن کسی تنازع میں ملوث ہوئے ہوں۔ دسمبر 2024 میں ان کی فلم پشپا 2 کی اسکریننگ کے دوران بھگدڑ مچنے پر ان کے خلاف مقدمہ درج ہوا تھا اور ایک رات انہیں حراست میں بھی گزارنی پڑی تھی۔