وفاقی کابینہ کی ایک ماہ کی تنخواہ سیلاب متاثرین کے لیے وقف، وزیرِ اعظم کا بڑا اعلان

وزیرِ اعظم شہباز شریف نے خیبرپختونخوا کے سیلاب متاثرین کی مدد کے لیے وفاقی کابینہ کی ایک ماہ کی تنخواہ عطیہ کرنے کا اعلان کیا ہے۔

بارشوں اور سیلاب سے متاثرہ علاقوں میں امدادی کارروائیوں کے حوالے سے ایک اعلیٰ سطح اجلاس کی صدارت کرتے ہوئے وزیرِ اعظم نے وفاقی اداروں کو خیبرپختونخوا میں متاثرہ افراد کی مدد کے لیے مزید متحرک ہونے کی ہدایت کی۔

وزیرِ اعظم نے کہا کہ "یہ وقت سیاست کا نہیں، انسانی خدمت کا ہے۔ مصیبت کی اس گھڑی میں وفاقی یا صوبائی حکومت کا فرق نہیں دیکھا جائے گا، بلکہ سب کو مل کر متاثرہ افراد کی بحالی کو یقینی بنانا ہے۔

انہوں نے نیشنل ہائی وے اتھارٹی (این ایچ اے) کو تاکید کی کہ شاہراہوں کی بحالی میں قومی و صوبائی سڑکوں کا امتیاز نہ کیا جائے، اور امدادی سرگرمیوں کے لیے راستے کھولنا اولین ترجیح ہونی چاہیے۔

وزیرِ اعظم نے یقین دہانی کرائی کہ جاں بحق افراد کے لواحقین اور دیگر متاثرین کو وزیرِ اعظم ریلیف پیکج کے تحت مالی امداد دی جائے گی۔

انہوں نے وزارتِ خزانہ کو ہدایت دی کہ این ڈی ایم اے کو فوری طور پر درکار وسائل فراہم کیے جائیں، جبکہ بینظیر انکم سپورٹ پروگرام کو بھی متاثرین کی مدد کے لیے فوری طور پر فعال کیا جائے۔

دوسری جانب وفاقی حکومت نے تمام متعلقہ وزراء کو 24 گھنٹوں کے اندر خیبرپختونخوا، آزاد کشمیر، اور گلگت بلتستان کے متاثرہ علاقوں میں پہنچنے اور امدادی سرگرمیوں کی براہِ راست نگرانی کرنے کی ہدایت جاری کر دی ہے۔