پنجاب کا انفرااسٹرکچر جلد جاپانی معیار تک پہنچائیں گے، مریم نواز

وزیراعلیٰ پنجاب مریم نواز نے کہا ہے کہ پنجاب میں انفرااسٹرکچر کو جاپان کے معیار تک لے جانے کا عزم ہے، اور یہ عمل جلد شروع ہو جائے گا۔

ٹوکیو میں پاکستانی کمیونٹی سے خطاب کرتے ہوئے وزیراعلیٰ کا کہنا تھا کہ پاکستان سے اچھی خبریں آنا شروع ہو گئی ہیں اور مزید مثبت پیش رفت جلد سامنے آئے گی۔ انہوں نے کہا کہ معاشی بہتری میں اوورسیز پاکستانیوں کا کردار انتہائی اہم ہے۔

مریم نواز نے دعویٰ کیا کہ چند ماہ قبل ملک میں مہنگائی 38 فیصد تھی، جو اب مسلم لیگ (ن) کی حکومت میں کم ہو کر 3 فیصد تک آ گئی ہے۔

انہوں نے کہا کہ پنجاب کے سرکاری اسپتالوں میں ادویات کی دستیابی بحال ہو چکی ہے، اور آج پاکستان بھر سے لوگ علاج کے لیے پنجاب آتے ہیں۔

وزیراعلیٰ نے کہا کہ پنجاب میں دنیا کا سب سے بڑا صفائی کا منصوبہ ’’ستھرا پنجاب‘‘ شروع کر دیا گیا ہے، جس کے تحت ڈیڑھ لاکھ ملازمتیں دی جا چکی ہیں تاکہ صوبے کو صاف اور صحت مند بنایا جا سکے۔ انہوں نے اعلان کیا کہ جاپان سے صفائی اور ماحولیاتی بہتری کے لیے جدید ٹیکنالوجی حاصل کی جائے گی۔

ان کا مزید کہنا تھا کہ سڑکوں کی تعمیر سے نواز شریف نے معیشت کو مضبوط کیا، اور اب جنوبی ایشیا کا سب سے بڑا کینسر اسپتال ’’نواز شریف کینسر اسپتال‘‘ تعمیر کیا جا رہا ہے۔ شہباز شریف صبح 7 بجے سے رات 12 بجے تک محنت کرکے ملک کو مسائل سے نکالنے کی کوشش کر رہے ہیں۔

وزیراعلیٰ نے وعدہ کیا کہ آئندہ 5 سال میں غریبوں کے لیے 5 لاکھ گھروں کی تعمیر کی جائے گی، جن میں سے ایک لاکھ گھر دسمبر تک مکمل ہوں گے۔

مزید یہ کہ دسمبر تک پنجاب میں 1100 الیکٹرک بسیں سڑکوں پر آ جائیں گی، جن کا کرایہ صرف 20 روپے ہوگا۔ اس کے ساتھ ساتھ 50 ہزار اسکالرشپس اور ایک لاکھ لیپ ٹاپ بھی مستحق طلبہ کو دیے جائیں گے۔