آزاد کشمیر میں شدید بارشوں کے باعث اسکولوں میں چار روزہ تعطیلات کا اعلان

آزاد کشمیر میں شدید بارشوں اور ممکنہ سیلابی صورتحال کے پیش نظر تعلیمی ادارے بند کرنے کا فیصلہ کیا گیا ہے۔ حکومت کی جانب سے جاری کردہ نوٹیفکیشن کے مطابق 19 سے 23 اگست تک تمام اسکول بند رہیں گے۔

نوٹیفکیشن میں کہا گیا ہے کہ یہ فیصلہ طلبہ، اساتذہ اور عملے کی حفاظت کو مدنظر رکھتے ہوئے کیا گیا ہے، کیونکہ حالیہ بارشوں نے کئی علاقوں کو متاثر کیا ہے اور مزید بارشوں کی پیش گوئی بھی کی جا چکی ہے۔

محکمہ موسمیات نے آزاد کشمیر میں آئندہ دو روز تک مسلسل موسلادھار بارش کی پیش گوئی کی ہے، جس سے لینڈ سلائیڈنگ اور نشیبی علاقوں میں سیلاب کا خطرہ مزید بڑھ گیا ہے۔

اس سے قبل آج خیبرپختونخوا کے اضلاع مانسہرہ اور تورغر میں بھی ضلعی انتظامیہ نے شدید بارشوں کے باعث دو روزہ تعطیلات کا اعلان کیا تھا۔