عمران خان کو جیل میں رکھنے میں پی ٹی آئی قیادت کامیاب ہو گئی: فیصل واوڈا

سابق وفاقی وزیر اور سینیٹر فیصل واوڈا نے الزام عائد کیا ہے کہ خیبرپختونخوا کی قیادت اور پاکستان تحریک انصاف (پی ٹی آئی) نے بانی پارٹی چیئرمین عمران خان کو جیل میں رکھنے کے لیے کردار ادا کیا اور اب اقتدار کے مزے لوٹ رہے ہیں۔

پارلیمنٹ ہاؤس میں میڈیا سے گفتگو کرتے ہوئے فیصل واوڈا نے کہا کہ، "یہ لوگ نعرہ لگاتے تھے کہ سب چور ہیں، سب بے ایمان ہیں، لیکن آج کے پی میں سینیٹ نشستوں پر جو نورا کشتی ہوئی، وہ سب کے سامنے ہے۔"

انہوں نے سابق وزیر خارجہ شاہ محمود قریشی پر طنز کرتے ہوئے کہا، "ان کا چہرہ دیکھا کریں، یہ ہمارے وزیر خارجہ رہ چکے ہیں۔"

فیصل واوڈا نے مولانا فضل الرحمان کے اس بیان کی تائید کی کہ خیبرپختونخوا کے سرکاری فنڈز کا 10 فیصد حصہ مبینہ طور پر مسلح گروہوں کو جاتا ہے۔ انہوں نے کہا، "یہ صرف ایک صوبے کی بات نہیں، اگر تمام صوبوں کے فنڈز کی چھان بین کی جائے تو بہت بڑا اسکینڈل سامنے آ سکتا ہے۔"

انہوں نے مزید کہا، "جو صوبے ناکام ہوتے ہیں، وہاں ایسی ہی تباہی دیکھنے کو ملتی ہے۔"

ملکی سلامتی کے حوالے سے بات کرتے ہوئے فیصل واوڈا نے کہا، "فیلڈ مارشل کی قیادت میں پاک فوج ملک کو بچاتی رہے گی۔ دہشت گردوں کے خلاف جاری آپریشن نہ صرف رکے گا نہیں بلکہ مزید تیز ہوگا۔ جو بھی اس تسلسل میں رکاوٹ بنے گا، چاہے وہ کتنا ہی بڑا ہو، رگڑ دیا جائے گا۔"