تین ملکی مذاکرات: وزیر خارجہ اسحاق ڈار کابل پہنچ گئے

وزیر خارجہ اسحاق ڈار ایک روزہ دورے پر کابل پہنچ گئے، جہاں کابل ایئرپورٹ پر افغانستان کے نائب وزیر خارجہ محمد نعیم اور دیگر اعلیٰ حکام نے ان کا استقبال کیا۔

پاکستان، افغانستان اور چین کے وزرائے خارجہ آج کابل میں سہ فریقی مذاکرات کے لیے ایک جگہ جمع ہو رہے ہیں، جن کا مقصد خطے میں تعاون، سلامتی اور ترقی کو فروغ دینا ہے۔

ترجمان دفتر خارجہ کے مطابق، وزیر خارجہ اسحاق ڈار چھٹے پاک، چین، افغانستان سہ فریقی مذاکرات میں پاکستان کی نمائندگی کریں گے۔ وفد میں افغانستان کے لیے نمائندہ خصوصی محمد صادق اور وزارتِ خارجہ کے دیگر سینئر افسران بھی شامل ہیں۔

دفتر خارجہ کے مطابق، مذاکرات میں انسداد دہشت گردی، تجارتی روابط اور سہ فریقی تعاون جیسے اہم موضوعات زیر غور آئیں گے۔ اس موقع پر وزیر خارجہ اسحاق ڈار کی افغان قائم مقام وزیر خارجہ سے دو طرفہ ملاقات بھی ہوگی، جس میں باہمی تعلقات اور خطے کی صورتحال پر تفصیلی گفتگو کی جائے گی۔

یہ سہ فریقی اجلاس پہلی مرتبہ کابل کی میزبانی میں منعقد ہو رہا ہے، جہاں افغانستان نے پاکستان اور چین کو سلامتی و اقتصادی امور پر بات چیت کے لیے مدعو کیا ہے۔ اجلاس میں افغانستان میں امن، استحکام اور ترقی کے تمام پہلوؤں پر تبادلہ خیال کیا جائے گا۔

ذرائع کے مطابق اجلاس کے ایجنڈے میں چین پاکستان اقتصادی راہداری (CPEC) کی افغانستان تک توسیع، علاقائی سلامتی کے اقدامات، اور افغان سرزمین پر سرگرم دہشت گرد تنظیموں سے متعلق امور بھی شامل ہیں۔

اجلاس کے بعد چینی وزیر خارجہ کابل سے اسلام آباد روانہ ہوں گے، جہاں وہ 21 اگست کو ہونے والے پاک چین اسٹریٹجک ڈائیلاگ میں شرکت کریں گے۔

واضح رہے کہ پاکستان، چین اور افغانستان کے درمیان آخری سہ فریقی اجلاس رواں سال 21 مئی کو بیجنگ میں منعقد ہوا تھا۔