بارش رکے گی تو پانی نکال دیں گے، مراد علی شاہ

وزیراعلیٰ سندھ مراد علی شاہ نے کہا ہے کہ جب بارش ہوگی تو پانی تو جمع ہوگا، اور جب بارش رُکے گی تو نکاسی بھی کر دی جائے گی۔

کراچی کے علاقے نرسری میں میڈیا سے گفتگو کرتے ہوئے وزیراعلیٰ کا کہنا تھا کہ موسمیاتی تبدیلیوں کے اثرات پوری دنیا پر پڑ رہے ہیں۔ انہوں نے کہا کہ صرف پچھلے ہفتے خیبر پختونخوا اور گلگت بلتستان میں بارشوں کے باعث 400 افراد جاں بحق ہوئے۔

مراد علی شاہ نے بتایا کہ گزشتہ روز شہر میں 12 گھنٹوں کے دوران 200 ملی میٹر یا اس سے زیادہ بارش ریکارڈ کی گئی۔ ان کے مطابق انتظامیہ، بلدیاتی ادارے اور وہ خود سڑکوں پر موجود ہیں اور عوام کی مدد کرتے ہوئے نکاسیٔ آب کا عمل جاری رکھے ہوئے ہیں۔

انہوں نے شہریوں سے اپیل کی کہ وہ احتیاط برتیں، کیونکہ آج حکومت کی جانب سے عام تعطیل کا اعلان کیا گیا ہے تاکہ لوگ گھروں میں رہیں، لیکن اس کے باوجود بہت سے افراد غیر ضروری طور پر باہر نکل رہے ہیں۔

وزیراعلیٰ نے تسلیم کیا کہ حکومت سے بھی بعض کوتاہیاں ہوسکتی ہیں، مگر کوششیں جاری ہیں اور متعلقہ ادارے اپنے فرائض انجام دے رہے ہیں۔

یاد رہے کہ گزشتہ روز کراچی میں وقفے وقفے سے ہونے والی موسلا دھار بارش کے باعث کئی علاقے زیر آب آگئے، اربن فلڈنگ کی صورتحال پیدا ہوئی، جبکہ مختلف حادثات میں متعدد قیمتی جانیں ضائع ہوئیں۔