کراچی میں دوبارہ موسلادھار بارش، نشیبی علاقے زیرِ آب آنے لگے

شہرِ قائد میں ایک بار پھر تیز ہواؤں کے ساتھ بارش کا سلسلہ شروع ہو چکا ہے، جس کے باعث نشیبی علاقوں میں پانی جمع ہونا شروع ہو گیا ہے۔

تفصیلات کے مطابق کراچی کے مختلف علاقوں — جن میں بہادرآباد، پی ای سی ایچ ایس، جمشید روڈ، ٹیپو سلطان روڈ، شاہ فیصل کالونی، ملیر ہالٹ، رفاہ عام، گارڈن، جناح اسپتال اور مضافاتی علاقہ جھمپیر شامل ہیں — میں بارش تیز ہواؤں کے ساتھ جاری ہے۔

ماہرینِ موسمیات کا کہنا ہے کہ شمالی بحیرۂ عرب پر دو مون سون سسٹمز سرگرم ہیں: ایک کیٹی بندر کے جنوب مشرق میں جبکہ دوسرا کَچ کے علاقے میں موجود ہے۔ اس کے علاوہ وسطی بھارت میں بھی ایک نمایاں کم دباؤ کا نظام موجود ہے۔

ان ماحولیاتی نظاموں کے اثر کے تحت کراچی سمیت جنوبی و زیریں سندھ میں آج بھی گرج چمک کے ساتھ بارش کا امکان ہے، جو آئندہ دو سے تین روز تک جاری رہ سکتی ہے۔

محکمۂ موسمیات کے ڈپٹی ڈائریکٹر، انجم نذیر ضیغم کے مطابق، کراچی میں دوپہر سے شروع ہونے والی بارش کا سلسلہ شام سات بجے تک برقرار رہ سکتا ہے۔ ان کے بقول، شہر کے شمال مشرقی حصوں میں گرج چمک کے بادل موجود ہیں جبکہ سندھ میں وقفے وقفے سے بارشیں 23 اگست تک جاری رہنے کی توقع ہے۔