کراچی میں موسلادھار بارش سے اربن فلڈنگ، نظامِ زندگی مفلوج، 8 افراد جاں بحق

سندھ کے دارالحکومت کراچی میں 19 اگست کو ہونے والی مون سون کی غیر معمولی شدید بارش کے بعد شہر کی سڑکیں تالاب کا منظر پیش کرنے لگیں۔ صرف دو گھنٹوں کی مسلسل بارش نے اہم شاہراہوں کو زیر آب کر دیا، جس سے نظامِ زندگی مفلوج ہو گیا۔

محکمہ موسمیات نے کراچی میں ہونے والی بارش کو "غیر معمولی شدید" قرار دیا، جس کے نتیجے میں اربن فلڈنگ کی صورتحال پیدا ہوئی۔ ناقص نکاسی آب کے باعث شہری اپنی گاڑیوں میں پھنس گئے، جبکہ شہر کے متعدد علاقوں میں بجلی کی طویل بندش نے عوام کو مزید مشکلات میں ڈال دیا۔

شہر کی اس صورتحال نے سوشل میڈیا پر بھی عوام کا غصہ بھڑکا دیا۔ شہریوں نے "ایکس" (سابقہ ٹوئٹر) پر حکومت کو شدید تنقید کا نشانہ بنایا اور برسوں سے ناقص نکاسی آب کے نظام پر سوالات اٹھائے۔

کئی صارفین نے پوسٹ کرتے ہوئے لکھا "کراچی ڈوب رہا ہے" اور "کراچی ڈوب چکا ہے"۔

سینئر صحافی اظہر عباس نے 1992 کی بارشوں کی ایک پرانی خبر کا حوالہ دیتے ہوئے لکھا کہ آج تک کراچی میں نکاسی آب کا نظام بہتر نہیں کیا جا سکا۔ انہوں نے آئی آئی چندریگر روڈ کو "کراچی کی وال اسٹریٹ" قرار دیتے ہوئے نشاندہی کی کہ وہاں بھی نکاسی کا نظام ناکارہ ہے۔ انہوں نے شاہراہ فیصل جیسے مرکزی روڈ پر بھی صورتحال پر تشویش ظاہر کی۔

سوشل میڈیا پر مون سون بارشوں سے متاثرہ شہریوں کی مشکلات اجاگر کی گئیں۔ کئی صارفین نے موسمیاتی تبدیلی کو شمالی علاقوں تک محدود نہ مانتے ہوئے اسے اب کراچی جیسے بڑے شہروں کا بھی مسئلہ قرار دیا۔

بعض صارفین نے جہاں میمز کے ذریعے مسائل پر طنز کیا، وہیں کئی افراد نے کراچی کے شہریوں کے لیے محبت اور دعاؤں کا اظہار بھی کیا۔