کراچی میں بارش سے ہلاکتیں 17 تک جا پہنچیں، نظامِ زندگی بدستور درہم برہم

کراچی میں وقفے وقفے سے ہونے والی شدید بارش کے بعد پیدا ہونے والی سیلابی صورتحال کے نتیجے میں جاں بحق افراد کی تعداد 17 ہو گئی ہے، جن میں بچے اور خواتین بھی شامل ہیں۔ شہر کی سڑکوں پر آج بھی بارش کے اثرات واضح ہیں—خراب گاڑیاں، گہرے گڑھے اور پانی سے بھری سڑکیں شہریوں کے لیے مشکلات کا باعث بنی ہوئی ہیں۔

محکمہ موسمیات کے مطابق گزشتہ 24 گھنٹوں میں گلشن حدید میں 178 ملی میٹر اور یونیورسٹی روڈ پر 145 ملی میٹر بارش ریکارڈ کی گئی۔ نکاسیٔ آب کا عمل جاری ہے، تاہم کئی علاقوں میں اب بھی برساتی پانی جمع ہے، جن میں آرام باغ، سندھ ہائی کورٹ، لیاقت آباد، اولڈ سٹی ایریا اور کارساز شامل ہیں۔

پولیس اور ریسکیو ذرائع کے مطابق بارش سے مختلف حادثات پیش آئے:

• پی ای سی ایچ ایس میں ایک معذور بزرگ شخص اپنے گھر میں پانی میں ڈوب کر جاں بحق ہوا۔

• نادرن بائی پاس اور سپر ہائی وے پر پانی اور گڑھوں میں ڈوبنے سے دو افراد جان سے گئے۔

• گرومندر اور نیو کراچی میں ندی و نالے سے دو لاشیں برآمد ہوئیں۔

• گلستان جوہر میں دیوار گرنے سے تین بچے اور دو خواتین جاں بحق ہوئیں، جبکہ اورنگی ٹاؤن میں بھی ایک بچی دیوار گرنے کے باعث جان بحق ہوئی۔

• شاہ فیصل کالونی، شارع فیصل، ڈیفنس، نارتھ کراچی اور گزری میں کرنٹ لگنے کے واقعات میں 6 افراد زندگی کی بازی ہار گئے۔