پنجاب کا خیبرپختونخوا اور کراچی سے اظہار یکجہتی، ہر ممکن تعاون کی پیشکش

پنجاب کی وزیر اطلاعات عظمیٰ بخاری نے خیبرپختونخوا میں حالیہ سیلاب اور شدید بارشوں سے ہونے والے جانی و مالی نقصان اور کراچی میں بارش کے باعث معمولاتِ زندگی کے متاثر ہونے پر گہری تشویش کا اظہار کیا ہے۔

اپنے ایک بیان میں عظمیٰ بخاری نے کہا کہ پنجاب، بطور بڑے بھائی، خیبرپختونخوا اور سندھ کے عوام کے ساتھ بھرپور یکجہتی کا مظاہرہ کرتا ہے، اور ہم دونوں صوبوں کی حکومتوں سے ہر ممکن تعاون کے لیے تیار ہیں۔

ان کا مزید کہنا تھا کہ اگر خیبرپختونخوا یا سندھ حکومت کو پنجاب سے کسی بھی قسم کی مدد درکار ہو، تو پنجاب بھرپور تعاون کرے گا۔

عظمیٰ بخاری نے یہ بھی بتایا کہ وزیراعلیٰ پنجاب مریم نواز نے خیبرپختونخوا کے وزیر علی امین گنڈاپور سے خود رابطہ کر کے ہر قسم کی معاونت کی پیش کش کی ہے۔

واضح رہے کہ کراچی میں حالیہ بارشوں کے دوران مختلف حادثات میں جاں بحق افراد کی تعداد 17 ہو چکی ہے۔