بھارتی وزیرخارجہ کااعتراف ، پاکستان کا صدر ایف اے ٹی ایف سے رابطے پر غور

جی این این کے مطابق ترجمان دفتر خارجہ  زاہد حفیظ کاکہنا ہے کہ بھارتی وزیرخارجہ ایس جے شنکر کا پاکستان کو گرے لسٹ میں رکھنے کے  بیان نے مودی سرکار کا چہرہ بے نقاب کر دیا ہے۔   پاکستان ہمیشہ سےدنیاکو بھارت کےایف اے ٹی ایف معاملے کو سیاسی بنانےسے آگاہ کر رہا ہے، پاکستان ایف اے ٹی ایف کے ایکشن پلان پر عمل کرنے میں سنجیدگی سے اقدامات کر رہا ہے۔

 انہوں نے کہاکہ بھارت نے شرمناک انداز سے پاکستان کی پیش رفت پر شکوک و شبہات پیدا کرنے کی کوشش کی، پاکستان بھارت کی جانب سے حالیہ اعتراف کو بھی بین الاقوامی برادری اور ایف اے ٹی ایف کے نوٹس میں لائے گا، ایس جے شنکرکاحالیہ اعتراف بھارت کے کردار پر سوالیہ نشان ہے۔

ترجمان دفتر خارجہ زاہد حفیظ کا کہنا ہے  کہ ایف اے ٹی ایف نے انسداد منی لانڈرنگ اور دہشت گردی کی فنانسنگ کے حوالے سے پاکستان کے ٹھوس اقدامات کو ہمیشہ سراہا، ہم بین الاقوامی ساتھیوں کی معاونت کے ساتھ کام کی اس رفتار کو برقرار رکھنے کیلئے پرعزم ہیں، بھارت کی پاکستان پر دباؤ ڈالنے کی کوششیں کبھی پوری نہیں ہوں گی۔

واضح رہے کہ بھارت نے فنانشل ایکشن ٹاسک فورس( فیٹف ) میں پاکستان کے خلاف سازش کا اعتراف کر لیا ۔

 گزشتہ روز بھارتی وزیر خارجہ نے  بی جے پی لیڈروں کے سامنے اپنے خطاب میں کہا تھا کہ ہماری کوششوں کے باعث پاکستان گرے لسٹ میں ہے ۔جے شنکر نے کہاکہ مودی حکومت یقینی بنا رہی ہے کہ پاکستان فیٹف گرے لسٹ میں ہی رہے ۔