بالاج ٹیپو قتل کیس، جے آئی ٹی نے گوگی بٹ کوگناہ گار قرار دے دیا

بالاج ٹیپو قتل کیس نیا رخ اختیار کرگیا ، جوائنٹ انویسٹی گیشن ٹیم (جے آئی ٹی) نے گوگی بٹ کوگناہ گار قرار دے دیا، گوگی بٹ نےامیربالاج کوقتل کروانے میں منصوبہ بندی کی۔

میڈیا رپورٹس کے مطابق خواجہ عقیل عرف گوگی بٹ امیربالاج قتل کیس کے مرکزی ملزم طیفی بٹ سے رابطہ میں رہا،گوگی بٹ ٹیپو خاندان کے تمام سابقہ قتل کیس میں بھی نامزد ملزم رہا ہے۔ جے آئی ٹی آئندہ پیشی پر گوگی بٹ کی ضمانت خارج کروانے کی استدعا کرے گی۔

واضح رہے کہ امیر بالاج کے قتل کے بعد ملزم خواجہ عقیل عرف گوگی بٹ فرار ہو گیا تھا، بعدازاں ملزم نے ضمانت حاصل کرلی تھی اور 15ستمبر تک عبوری ضمانت پر ہے جبکہ ملزم طیفی بٹ تاحال اشتہاری ملزم ہے۔

یاد رہے کہ امیر بالاج ٹیپو کو 18 فروری 2024 کو شادی کی تقریب میں فائرنگ کر کے قتل کر دیا گیا تھا۔

لاہور پولیس کے مطابق ٹیپو ٹرکاں والا کا بیٹا امیر بالاج ٹیپو ٹھوکر نیاز بیگ کے قریب ایک نجی ہاؤسنگ سوسائٹی میں سابق ڈی ایس پی اکبر اقبال بلا کے بیٹے کی شادی کی تقریب میں شریک تھا۔

شادی کی تقریب کے دوران وہاں موجود ایک حملہ آور نے فائرنگ کردی جس سے امیر بالاج ٹیپو سمیت 3 افراد زخمی ہوگئے جنہیں اسپتال منتقل کیا گیا تھا۔

پولیس کے مطابق امیر بالاج ٹیپو زخموں کی تاب نہ لاتے ہوئے دم توڑ گیا تھا، جبکہ مقتول امیر بالاج ٹیپوکے محافظوں کی فائرنگ سے حملہ آور بھی موقع پر مارا گیا تھا۔

بعدازاں امیر بالاج کے قتل کی تفتیش کے دوران پولیس نے امیر بالاج ٹیپو کے قریبی دوست احسن شاہ کو طیفی بٹ اور اس کے ساتھیوں کو اپنے دوست کی نقل و حرکت کے بارے میں خفیہ معلومات دینے پر گرفتار کر لیا تھا، بعدازاں ملزم احسن شاہ اگست 2024 میں مبینہ پولیس مقابلے میں ہلاک ہوگیا تھا۔