علی امین گنڈاپور مولانا فضل الرحمن پر برس پڑے ، 26 ویں آئینی ترمیم پر تنقید کے نشتر چلا دیے

اسلام آباد:وزیراعلیٰ خیبرپختونخوا علی امین گنڈاپور نے جمعیت علمائے اسلام کے سربراہ مولانا فضل الرحمان پر سخت تنقید کرتے ہوئے کہا ہے کہ وہ ہمیشہ سسٹم کے بینیفشری رہے ہیں اور پہلی بار عمران خان کے دور میں بے نقاب ہوئے۔

تفصیلات کے مطابق اسلام آباد میں صحافیوں سے گفتگو کرتے ہوئے علی امین گنڈاپور نے الزام عائد کیا کہ مولانا فضل الرحمان نے ماضی میں عورت کی حکمرانی کے خلاف فتویٰ دے کر ڈیزل کے پرمٹ حاصل کیے،اور اب انہوں نے عورت کی حکمرانی کو بھی قبول کر لیا ہے۔

علی گنڈاپور کا کہنا تھا کہ مولانا فضل الرحمان نے 26 ویں آئینی ترمیم میں پیسے لیے ہیں اور ووٹ بھی دیے ہیں ۔ ہماری پارٹی نے مولانا کے پیچھے نمازیں پڑھیں  مگر مولانا نے حکومت کا ساتھ دے دیا۔

علی امین گنڈاپور نے مزید  کہا کہ مولانا فضل الرحمان اگر حق کا کلمہ پڑھنے کے لیے راضی ہو گئے ہیں تو میں ان کو ویلکم کروں گا، مگر مولانا فضل الرحمان کو میں جانتا ہوں، وہ حق کا کلمہ نہیں پڑھیں گے۔

 اس موقع پر صحافی نے سوال کیا کہ آپ مولانا پر پیسے لینے کا الزام لگا رہے ہیں، یہ پہلی بار سامنے آیا ہے ، جس پر انہوں نے جواب دیا کہ تو مولانا ووٹ کیوں دیں گے؟ پیسے ہی لیے ہوں گے۔

 انہوں نے کہا کہ میں نے اپنی پارٹی قیادت کو پہلے ہی خبردار کیا تھا کہ مولانا ہمارے ساتھ نہیں چلیں گے۔

پریس کانفرنس میں گفتگو کرتے ہوئے انہوں نے مزید کہا کہ ڈی آئی خان کے عوام کو کہا جاتا تھا کہ مولانا کو ووٹ دیں۔ مولانا فضل الرحمان کی ڈیرہ اسماعیل خان میں ضمانت ضبط ہوئی۔ جبکہ یہ بلوچستان سے بھی فارم 47 پر  جیتے ہیں۔

ان کا مزید کہنا تھا کہ مولانا ہمیشہ باسز کا حکم مانتے ہیں۔ مولانا فضل الرحمان نے ہمیشہ نوٹ وکھا میرا موڈ بنے کا راستہ اختیار کیا ہے۔

وزیراعلیٰ کا کہنا تھا کہ عمران خان نے جب اسلام اور مسلمانوں کی بات کی تو مولانا فضل الرحمان کو عوام نے ریجیکٹ کر دیا۔