پنجاب حکومت کا تاریخ میں پہلی بار جنگل کی لکڑی کی نیلامی کا روایتی نظام ختم کرنے کا فیصلہ

پنجاب حکومت کا تاریخ میں پہلی بار جنگل کی لکڑی کی نیلامی کا روایتی نظام ختم کرنے کا فیصلہ کیا ہے جب کہ جنگلات کی لکڑی کی نیلامی پر پابندی کا باضابطہ حکم نامہ جاری کردیا گیا۔

وزیراعلیٰ پنجاب نے درختوں کی نیلامی کی آڑ میں جنگلوں کی کٹائی کا دھندہ بند کردیا ہے اور پنجاب کی تاریخ میں پہلی بار جنگل کی لکڑی کی نیلامی کا روایتی نظام ختم کر دیا گیا ہے، جدید ٹیکنالوجی اور میپنگ کی مدد سے نئے اور شفاف قواعد و ضوابط بنائے جائیں گے۔

وزیراعلیٰ مریم نواز کی ہدایت پر پنجاب کے تمام جنگلات میں کٹائی اور لکڑی کی نیلامی پر فوری پابندی عائد کردی گئی ہے جب کہ جنگلات کی لکڑی کی نیلامی پر پابندی کا باضابطہ حکم نامہ جاری کردیا گیا ہے۔

حکم نامے کے مطابق نیلامی کے نام پر جنگلات کے درخت بے رحمی سے کاٹ لیے جاتے تھے اور پیسہ چند جیبوں میں چلا جاتا تھا۔ جنگلات، جنگلی حیات اور ماہی پروری کے محکمے کے ڈائریکٹر جنرل کو عمل درآمد یقنی بنانے کی ہدایت کی گئی ہے۔

حکم نامے میں کہا گیا ہے کہ ایندھن سمیت ہر قسم کی لکڑی کی نیلامی پر تاحکم ثانی پابندی عائد کردی ہے، وزیراعلیٰ پنجاب نے یہ اقدام جنگلات کے تحفظ ،زمین کو کٹاﺅ سے محفوظ بنانے کے لیے کیا، مستقبل میں نیلامی سے قبل اعلی معیار کی وڈیوز اور فوٹوز دی جائیں گی۔