چین کا دنیا کے 48 ممالک کے شہریوں کو ویزا فری انٹری دینے کا باضابطہ اعلان

چین نے دنیا کے 48 ممالک کے شہریوں کو ویزا فری انٹری دینے کا باضابطہ اعلان کر دیا ہے، یہ سہولت ستمبر 2025 سے نافذ العمل ہوگی، اس اقدام کا مقصد سیاحت، سرمایہ کاری اور بین الاقوامی تعلقات کو فروغ دینا ہے، تاہم پاکستان اس فہرست میں شامل نہیں ہے۔

چینی حکومت کی جانب سے جاری کردہ فہرست میں زیادہ تر یورپی ممالک شامل ہیں جن میں فرانس، جرمنی، اٹلی، سپین، آئرلینڈ، پرتگال، ہالینڈ، بیلجیئم، لکسمبرگ، آسٹریا، یونان، ہنگری، سوئٹزرلینڈ، ناروے، فن لینڈ، ڈنمارک، آئس لینڈ، سلوواکیہ، سلووینیا، رومانیہ، کروشیا، مالٹا اور قبرص شامل ہیں، اس کے علاوہ برطانیہ کی قریبی ریاست موناکو، اینڈورا اور لیختنسٹائن کو بھی اس سہولت میں شامل کیا گیا ہے۔

یورپ کے بعد ایشیا اور مشرق وسطیٰ کے چند ممالک کو بھی یہ رعایت دی گئی ہے جن میں جاپان، جنوبی کوریا، ملائیشیا، برونائی، سعودی عرب، کویت، بحرین اور عمان شامل ہیں، اسی طرح آسٹریلیا اور نیوزی لینڈ کو بھی اس فہرست میں جگہ دی گئی ہے، لاطینی امریکا کے کئی ممالک جیسے برازیل، ارجنٹینا، چلی، پیرو اور یوراگوئے بھی ویزا فری انٹری کے اہل قرار دیئے گئے ہیں۔

 دلچسپ بات یہ ہے کہ روس کو بھی پہلی مرتبہ اس سہولت میں شامل کیا گیا ہے، جسے چین اور روس کے تعلقات میں ایک اہم پیش رفت سمجھا جا رہا ہے۔

پاکستانی شہریوں کے لیے یہ اعلان کچھ حیران کن ہے کیونکہ پاک-چین تعلقات کو "آہنی دوستی" کہا جاتا ہے اور دونوں ممالک سی پیک جیسے بڑے منصوبوں میں قریبی شراکت دار ہیں، ماہرین کا کہنا ہے کہ مستقبل میں پاکستان کو بھی اس فہرست میں شامل کیا جا سکتا ہے، لیکن فی الحال چینی حکومت نے اس حوالے سے کوئی واضح اشارہ نہیں دیا۔