سندھ حکومت کا جشن عید میلاد النبی ﷺ پر 5 اور 6 ستمبر کو عام تعطیل کا اعلان

کراچی: حکومتِ سندھ نے عید میلاد النبی ﷺ کے پُروقار موقع پر 5 ستمبر (جمعہ) اور 6 ستمبر (ہفتہ) کو صوبے بھر میں عام تعطیل کا اعلان کر دیا ہے۔ اس حوالے سے باقاعدہ نوٹیفکیشن بھی جاری کر دیا گیا ہے۔

جاری کردہ نوٹیفکیشن میں کہا گیا ہے کہ تمام سرکاری دفاتر، تعلیمی ادارے اور نیم سرکاری ادارے دونوں دن بند رہیں گے۔

تاہم، نوٹیفکیشن میں یہ بھی وضاحت کی گئی ہے کہ سیلابی صورتحال سے نمٹنے کے لیے تعینات حکام، ایمرجنسی سروسز اور اہم سروسز پر موجود افسران و عملہ دونوں دن اپنے فرائض انجام دیتے رہیں گے۔

وفاقی حکومت کا بھی چھٹی کا اعلان

اس سے قبل وفاقی حکومت بھی عید میلاد النبی ﷺ کے موقع پر 12 ربیع الاول بمطابق 6 ستمبر (ہفتہ) کو ملک بھر میں عام تعطیل کا اعلان کر چکی ہے۔ وزیراعظم شہباز شریف کی منظوری سے کابینہ ڈویژن نے نوٹیفکیشن جاری کیا تھا۔

میلاد النبی ﷺ: مذہبی عقیدت و احترام کا دن

واضح رہے کہ عید میلاد النبی ﷺ کو پاکستان سمیت دنیا بھر میں نبی آخر الزمان حضرت محمد مصطفیٰ ﷺ کی ولادت باسعادت کے دن کے طور پر مذہبی جوش و جذبے اور عقیدت و احترام سے منایا جاتا ہے۔ اس موقع پر جلوس، محافل نعت، درود و سلام، اور خیرات کا وسیع انتظام کیا جاتا ہے۔