پیوٹن کی مغربی ممالک کو دھمکی، یوکرین میں تعینات نیٹو فوجی اہلکار جائز ہدف قرار

ماسکو:  روسی صدر ولادیمیر پیوٹن نے یوکرین میںتعینات مغربی ممالک کے فوجی اہلکاروں کو نشانہ بنانے کی دھمکی دے دی ہے۔ 

ایسٹرن اکنامک فورم سے خطاب میں پیوٹن نے مشرقی شہر ولادی دوستوک میں ایک اقتصادی فورم سے خطاب کرتے ہوئے کہا کہ یوکرین میں موجود کسی بھی مغربی فوجی اہلکار کو روس کے لیے ـجائز ہدف سمجھا جائے گا۔ 

ان کا یہ بیا ن فرانسیسی صدر ایمانوئل میکرون کے حالیہ بیان کے رد عمل میں سامنے آیاہےجس میں میکرون نے کہا تھا کہ 26 مغربی ممالک نے یوکرین کے لیے جنگ کے بعد سیکیورٹی ضمانتیں دینے کا وعدہ کیا ہے،ان ضمانتوں میں زمین، سمندر اور فضا میں بین ا لاقوامی فورسز کی تعنیاتی شامل ہے۔ 

پیوٹن نے خبردار کیا کہ اگر روس اور یوکرین کے درمیان امن معاہدہ ہو بھی جا تا ہے تو مغربی ممالک کے فوجی اہلکار یوکرین میں نظر آئے تو انہیں جائز ہدف سمجھا جائے گا۔

خیال رہے کہ روس ایک طویل عرصے سے یہ موقف اختیار کیے ہوئے ہے کہ یوکرین پر حملے کی ایک بڑی وجہ نیٹو کو یوکرین میں قدم جمانے اور وہاں افواج تعینات کرنے سے روکنا تھا۔ 

واضح رہے کہ فروری 2022 سے جاری روس اور یوکرین کی جنگ میں اب تک دونوں ممالک کے لاکھوں فوجی و شہری ہلاک اور زخمی ہو چکے ہیں ۔