علیمہ خان پر انڈا پھینکنے والی خواتین پی ٹی آئی کی کارکنان نکلیں: راولپنڈی پولیس

راولپنڈی پولیس کا کہنا ہے کہ اڈیالہ جیل کے باہر سابق وزیراعظم اور تحریک انصاف کے بانی عمران خان کی بہن، علیمہ خان پر انڈے پھینکنے والی خواتین کا تعلق خود پاکستان تحریک انصاف سے ہے۔

یہ واقعہ اس وقت پیش آیا جب علیمہ خان اڈیالہ جیل کے باہر میڈیا سے گفتگو کر رہی تھیں۔ اسی دوران دو انڈے ان کی جانب پھینکے گئے، جن میں سے ایک انہیں لگا، جس پر موقع پر موجود پارٹی کارکنوں نے شدید احتجاج کیا اور ہنگامہ آرائی شروع ہو گئی۔

پولیس نے فوری کارروائی کرتے ہوئے دو خواتین کو موقع سے حراست میں لے کر اڈیالہ پولیس چوکی منتقل کر دیا۔

راولپنڈی پولیس کے ترجمان کے مطابق، انڈے پھینکنے والی خواتین کا تعلق پی ٹی آئی سے ہے، اور وہ خیبرپختونخوا سے تعلق رکھنے والے آل گورنمنٹ ایمپلائز گرینڈ الائنس اور ایپکا کے ہمراہ احتجاج کے لیے آئی تھیں۔ ترجمان نے بتایا کہ علیمہ خان نے مظاہرین کے سوالات کا جواب نہیں دیا، جس کے بعد یہ واقعہ پیش آیا۔

پولیس کا کہنا ہے کہ واقعے میں ملوث خواتین تفتیش کے لیے پولیس کی تحویل میں ہیں۔