سیلاب کے اثرات لاہور کی منڈیوں میں، سبزیاں، پھل اور مرغی کا گوشت شدید مہنگا

سیلاب کے اثرات لاہور کی مارکیٹوں تک پہنچ گئے ہیں، جہاں سبزیاں، پھل اور مرغی کا گوشت عام صارفین کی پہنچ سے باہر ہوتا جا رہا ہے۔ قیمتوں میں اچانک اضافے نے شہریوں کو شدید پریشانی میں مبتلا کر دیا ہے۔

شہر کی منڈیوں میں سبزیوں کی قیمتیں آسمان سے باتیں کرنے لگی ہیں:

ٹماٹر: 300 سے 400 روپے فی کلو ، مٹر: 400 روپے فی کلو ، بھنڈی: 240 سے 250 روپے فی کلو ، ادرک: 500 روپے فی کلو ، لہسن: 400 روپے فی کلو ، کریلا: 200 روپے فی کلو ، اروی: 160 روپے فی کلو

شہریوں کا کہنا ہے کہ روزمرہ کی اشیاء خصوصاً سبزیاں اس قدر مہنگی ہو گئی ہیں کہ متوسط طبقے کے لیے گھر کا بجٹ سنبھالنا مشکل ہو گیا ہے۔

دکانداروں کے مطابق، قیمتوں میں اضافے کی اصل وجہ سیلاب سے سبزیوں کی پیداوار میں کمی اور ترسیل کے مسائل ہیں۔ کئی راستے بند ہونے اور ترسیلی لاگت بڑھنے کے باعث سبزیاں مہنگی داموں منڈی تک پہنچ رہی ہیں۔

مرغی کے گوشت اور انڈوں کی قیمتیں بھی بڑھ گئی ہیں:

مرغی کا گوشت: 640 روپے فی کلو ، انڈے: 300 روپے فی درجن

شہریوں نے مطالبہ کیا ہے کہ حکومت فوری طور پر قیمتوں پر کنٹرول کے لیے اقدامات کرے تاکہ روزمرہ کی ضروری اشیاء عام آدمی کی پہنچ میں رہیں۔