وزیراعظم شہباز شریف سے فلسطینی صدر کے مشیر اور امام مسجد اقصیٰ کی ملاقات

وزیراعظم شہباز شریف سے فلسطینی صدر کے مشیر برائے مذہبی امور اور شرعی عدالت کے چیف جسٹس محمود صدیقی الھباش اور مسجد اقصیٰ کے امام احمد حسین نے اسلام آباد میں ملاقات کی۔ ملاقات میں پاکستان میں متعین فلسطینی سفیر بھی شریک تھے۔

اس موقع پر وزیراعظم نے فلسطینی صدر محمود عباس کے لیے نیک خواہشات اور تہنیتی پیغام بھیجا، اور اس بات کا اعادہ کیا کہ پاکستان، فلسطینی عوام کی جدوجہد اور ان کے حقِ خودارادیت کی مکمل اور غیر متزلزل حمایت جاری رکھے گا۔

وزیراعظم شہباز شریف نے کہا کہ "فلسطینی عوام نے بے پناہ قربانیاں دی ہیں اور بڑی بہادری سے اسرائیلی جارحیت کا سامنا کیا ہے۔ پاکستان ہر بین الاقوامی اور سفارتی فورم پر فلسطینیوں کے حقوق کے لیے بھرپور آواز بلند کرتا رہے گا۔"

انہوں نے مزید کہا کہ غزہ کے عوام کے لیے انسانی امداد کی فراہمی کا سلسلہ بھی جاری رکھا جائے گا۔

فلسطینی صدر کے مشیر نے پاکستانی حکومت اور عوام کی مسلسل حمایت پر شکریہ ادا کرتے ہوئے کہا کہ:

"مشکل وقت میں پاکستان کی حمایت ہمارے لیے حوصلے اور تقویت کا باعث ہے۔"

محمود صدیقی الھباش نے پاکستان میں حالیہ سیلاب پر تعزیت بھی کی، اور ملاقات کے اختتام پر صدر محمود عباس کی جانب سے وزیراعظم کے نام ایک خصوصی خط بھی پیش کیا۔

یہ ملاقات اس وقت ہوئی جب فلسطینی وفد اسلام آباد میں سیرت کانفرنس میں شرکت کے لیے موجود ہے، جس کی قیادت محمود صدیقی الھباش کر رہے ہیں۔